120 մլն դոլարի պարգևավճարի 95 տոկոսից ավելի ստացել են նախարարությունների, մարզպետարանների, պետական գերատեսչությունների սովորական աշխատակիցները՝ մասնագետ, ավագ մասնագետ, բաժնի պետ, վարչության պետ և այլն: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Գևորգ Պապոյանը՝ անդրադառնալով Ռոբերտ Քոչարյանի հայտարարությանը, թե այդ պարգևավճարները ըստ էության կոռուպցիա են և գողություն բյուջեից:
«Այսինքն այդ գումարի մեծ մասը ստացել են ՀՀ հասարակ քաղաքացիները՝ պետծառայողներ, քաղծառայողներ և այլն: ԱԺ-ում օրինակ, մի քանի հարյուր աշխատող կա, որոնք միշտ ստացել են պարգևատրում, բացառությամբ ԱԺ պատգամավորների, որոնք վերջին անգամ փետրվարին են ստացել պարգևավճար: Ասենք Աժ-ում կան աշխատողներ, որոնք 120-150 հազար դրամ աշխատավարձ են ստանում, եթե նրանց համար 30 հազար դրամ պարգևավճարը շատ են համարում, թող կանգնեն ու միանգամից դա ասեն: Մենք այդպես չենք համարում»,-ասաց նա:
Ինչ վերաբերում է Քոչարյանի պնդմանը, թե վերջին 2 ամսում ավելի շատ մարդ է տուգանվել, քան իր պաշտոնավարման 10 տարիներին, Պապոյանը հիշեց, որ Քոչարյանի կառավարման տարիներին վարորդները ծխախոտի տուփի մեջ գումար էին դնում, շպրտում մեքենաներից ոստիկաններին, ինչը հիմա չկա:
