Հայտարարվել են «Էմմի» 72-րդ մրցանակի հավակնորդները, որը շնորհվում է տարվա լավագույն սերիալներին, շոուներին և հեռուստածրագրերին: Մրցանակի հավակնորդների ամբողջական ցուցակը կհրապարակվի Ամերիկյան հեռուստաակադեմիայի պաշտոնական կայքում:
Անվանակարգերի թվով առաջատարը «Պահապաններ» սերիալն է. 26 անվանակարգ՝ ներառյալ «Լավագույն մինի-սերիալ» և 6 դերասանական անվանակարգեր (մրցանակի են առաջադրվել գլխավոր դերակատարներ Ջերեմի Այրոնսը և Ռեջինա Քինգը, իսկ երկրորդ պլանի դերերի համար՝ Ջին Սմարթը, Յախյա Աբդուլ-Մաթին II-ը, Ջովան Ադեպոն և Լուիս Գոսեթ-կրտսերը):
Amazon-ի նախագիծը՝ «Զարմանալի տիկին Մեյզելը», ստացել է 20 անվանակարգ, այդ թվում՝ «Լավագույն կատակերգական սերիալ»: Նրա մրցակիցներն են «Զսպիր քո էնտուզիազմը», «Ինձ համար մեռած», «Ավելի լավ աշխարհում», «Սպիտակ ագռավը», «Կոմինսկիի մեթոդը», «Շիթս Քրիք» և «Ինչ ենք մենք անում ստվերում»:
«Լավագույն դրամատիկական սերիալ»-ում 18 անվանակարգ են ստացել «Օզարկը» և «Ժառանգները» շոուները: Այստեղ «Էմմի» են հավակնում նաև «Ավելի լավ է զանգահարեք Սոլին», «Սպանելով Եվային», «Մանդալորեց», «Թագը», «Աղախնի պատմվածքը», «Շատ տարօրինակ գործեր» սերիալները:
«Էմմի-2020» մրցանակաբաշխության արարողությունը տեղի կունենա սեպտեմբերի 20-ին, Լոս Անջելեսում: