Կարեն Դեմիրճյանի անվան մարզահամերգային համալիրում ավարտվել է Դատավորների ընդհանուր ժողովը։
ՍԴ դատավորի թափուր տեղի համար ժողովն ընտրել է Վճռաբեկ դատարանի նախագահ Երվանդ Խունդկարյանին՝ 145 ձայնով: Նրա թեկնածությունը կներկայացվի Ազգային ժողովին: Մրցակից թեկնածուն Տավուշի մարզի ընդհանուր իրավասության դատարանի նախագահ Արման Կուրեխյանն էր, հայտնում է Ardaily.am-ը։
Բարձրագույն դատական խորհրդի դատավոր անդամի թափուր պաշտոնում ընտրվել է ՀՀ Վճռաբեկ քաղաքացիական դատարանի դատավոր Ստեփան Միքայելյանը՝ 97 ձայնով: Մրցակիցները Վճռաբեկ դատարանից Սուրեն Անտոնյանն ու Գոռ Հակոբյանն էին, ովքեր առողջական խնդիրների պատճառով չէին մասնակցում ժողովին։
Նշենք, որ դատավորների ընդհանուր ժողովն անցկացվել է դռնփակ, նիստին 236 դատավորից մասնակցել է 180-ը։
Ինչ վերաբերում է հանձնաժողովների ընտրությանը, ապա ինտրիգը վեթինգում առանցքային նշանակություն ունեցող էթիկայի հանձնաժողովում էր, որտեղ պայքարում Վճռաբեկ դատարանի 2 թեկնածուներն էին՝ Գոռ Հակոբյանը և Ելիզավետա Դանիելյանը: Ելիզավետա Դանիելյանը ստացել է 126 ձայն, իսկ Գոռ Հակոբյանը՝ 67: Մանրամասները՝ սկզբնաղբյուրում։
Հիշեցնենք, որ ՀՀ դատավորների հերթական ընդհանուր ժողովը պետք է կայանար դեռևս մարտի 13-ին, սակայն համավարակով պայմանավորված՝ հետաձգվել էր։