Սյունիքի մարզի ընդհանուր իրավասության դատարանը մերժել է ԱԺ նախկին պատգամավոր Առաքել Մովսիսյանի՝ Շմայսի որդու՝ Դավիթ Մովսիսյանի կալանքը ևս երկու ամսով երկարացնելու մասին քննիչի միջնորդությունը՝ հիմնավոր կասկածի բացակայության հիմքով։
«Այսինքն՝ Դավիթ Մովսիսյանի առնչությունն իրեն մեղսագրվող արարքին չկա»,- մեր զրույցում նշեց Դավիթ Մովսիսյանի շահերի պաշտպան, փաստաբան Գոռ Գևորգյանը։
Փաստաբանը նշեց. «Ես զբաղվում եմ բացառապես իրավաբանությամբ…Իմը ընդամենը իրավական պայքար է: 6 ամսվա համառ պայքարի արդյունքում կարողացանք հաջողության հասնել և ապացուցել, որ այս գործում հիմնավոր կասկածը չկա: Վեց ամսվա ընթացքում ապացույց ձեռք չի բերվել, որ Դավիթ Մովսիսյանը որևէ կապ ունի ծառայակցի ինքնասպանության հետ: Կոնկրետ տուժող զինվորի հետ Դավիթ Մովսիսյանի առնչությունը եղել է վիճաբանությունը:
Այն, որ վիճաբանություն եղել է, մենք ի սկզբանե ընդունել ենք: Բայց ամեն վիճաբանություն չի կարող դառնալ ինքնասպանության պատճառ: Ի սկզբանե առաջին ցուցմունքը Դավիթ Մովսիսյանն է տվել, նա ընդունել է, որ վիճաբանություն ունեցել է ծառայակցի հետ, բայց դա ինքնասպանության հասցնող վիճաբանություն չի եղել» :
Նշենք, որ գործով նշանակված է հետմահու դատահոգեբանական փորձաքննություն, որի եզրակացությամբ պետք է որ պատասխան տրվի նաև հարցին, թե ծառայակցի հետ վիճաբնությունը կարո՞ղ էր պատճառահետևանքային կապ ունենալ զինվորի ինքնասպանության հետ: Փորձաքննությունը դեռ ավարտված չէ, եզրակացությունը դեռևս տրված չէ:
Փաստաբան Գոռ Գևորգյանը հայտնեց, որ Դավիթ Մովսիսյանի նախկին կալանքի ժամկետը լրանում է օգոստոսի 1-ին: Հենց այդ օրը Դավիթ Մովսիսյանը պետք է ազատվի կալանքից ու անմիջապես գնա զինվորական ծառայությունը շարունակելու: «Հայոց բանակում ևս մի զինվոր կավելանա»,- ասաց փաստաբանը և տեղեկացրեց, որ Դավիթ Մովսիսյանի ծառայությանը դեռ մեկուկես տարի կա: Եթե նրա մասով կայացվի արդարացման կամ քրեական հետապնդումը դադարեցնելու դատական ակտ, ապա նախնական կալանքի տակ գտնվելու 6 ամիսը կգումարվի ծառայության ժամկետին»:
Փաստաբանը նշեց, որ պաշտպանական կողմը պատրաստ է նաև դատախազության բողոքին՝ կալանքի ժամկետը երկարացնելու միջնորդությունն ընդհանուր իրավասության դատարանի կողմից մերժելու որոշման դեմ: Սյունիքի մարզի ընդհանուր իրավասության դատարանի որոշումը փաստաբանը բնորոշեց որպես օբյեկտիվ կայացված օրինական ու հիմնավոր դատական ակտ, որը վերադաս դատական ատյաններում էլ կարող է քննություն բռնել:
Հիշեցնենք, որ 2020 թվականի հունվարի 30-ին զորամասերից մեկում հրազենային վիրավորումից մահացել էր 2000 թ. ծնված Վահրամ Ա.-ն։ Տեղի ունեցածը որակվել է որպես ինքնասպանություն ու քրեական գործ է հարուցել ՀՀ քրեական օրենսգրքի 110 հոդվածի 1-ին մասով՝ ինքնասպանության հասցնելու հատկանիշներով։
Ըստ վարույթն իրականացնող մարմնի վարկածի՝ տուժող զինծառայողն իրեն ամրակցված ինքնաձիգից ինքնասպանություն գործելու դիտավորությամբ կրակել է իր կրծքավանդակին։
Զինվորի հարազատները չեն հավատում ինքնասպանության վարկածին, հենց սկզբից նրանք բողոքել են, որ սպանությունը ներկայացվում է որպես ինքնասպանություն: Բողոքողները հանդիպել են ՀՀ պաշտպանության նախարար Դավիթ Տոնոյանի հետ, հանդիպումից հետո դադարեցրել են բողոքի գործողությունը: Նույն օրը հայտարարվել է, որ քրեական գործով տեղի են ունեցել ձերբակալություններ: Ամենաաղմկոտ ձերբակալությունը հենց ԱԺ նախկին պատգամավոր Առաքել Մովսիսյանի՝ Շմայսի որդու՝ Դավիթ Մովսիսյանի ձերբակալությունն էր:
Դավիթին մեղադրանք է առաջադրված ՀՀ քրեական օրենսգրքի 359 հոդվածի 3-րդ մասով՝ զինծառայողների փոխհարաբերությունների կանոնագրքային կանոնները խախտելը նրանց միջև ստորադասության (ենթակայության) հարաբերությունների բացակայության դեպքում, որն անզգուշությամբ առաջացրել է ծանր հետևանքներ: Մովսիսյանը շուրջ վեց ամիս անազատության մեջ է, կալանքի ժամկետը չերկարացվելու պայմաններում նա կալանքից կազատվի օգոստոսի 1-ին ու անմիջապես կմեկնի զինվորական ծառայությունը շարունակելու։
Հիշեցնենք, որ բացի Դավիթ Մովսիսյանից՝ մեղադրանք էր առաջադրվել նաև տուժող Վահրամ Ա.-ի երեք այլ համածառայակիցների, որոնցից երկուսը գտնվել են կալանքի տակ և նույնպես ազատ են արձակվել՝ հիմնավոր կասկածի բացակայության հիմնավորմամբ՝ նշեց փաստաբանը:
Զինվորի ինքնասպանութան գործով նախաքննությունը շարունակվում է: Մեղադրյալների կալանքի ժամկետները չերկարացնելը դեռ քննության ավարտը չէ:
