Հայաստանի շախմատի հավաքականի առաջատար և աշխարհի նորընծա չեմպիոն Լևոն Արոնյանը աշխարհի թիմային առաջնության ավարտից հետո զրուցել է chess-news.ru-ի լրագրողի հետ: Հարցազրույցը ներկայացնում ենք կրճատումներով:
– Ողջույն, Լևոն։
– Բարև Ձեզ:
– Դուք 5 հաղթողներից մեկն եք, անգամ՝ 6, եթե հաշվի առնենք մարզչին:
– Կարելի հաշվել նաև ֆիզպատրաստվածության մարզչին, և կստացվի 7 հոգի:
– Ահա թե ինչ…
– Պատվիրակության ղեկավարի հետ միասին կստացվի 8 հոգի: Ինչպես նաև բազմաթիվ հայերը, որոնք աջակցում էին մեզ:
– Այդ դեպքում չենք կարողանա հաշվել:
– Դուք իրավացի եք:
– Փաստորեն, Նինգբոյում ձեզ հետ էին նաև ֆիզպատրաստվածության մարզիչն ու պատվիրակության ղեկավարը:
– Այո, իհարկե:
– Սա առաջի՞ն անգամ էր, թե՞ նախկինում դուք էլի էիք ֆիզպատրաստվածության մարզչի հետ մեկնել մրցաշարի:
– Գաղափարը վաղուց կար, սակայն… չեմ վախենա ասել, բայց դա իմ միտքն էր. ամեն դեպքում մեզ անհրաժեշտ է մեկը, որը կհետևի շախմատիստների առողջական վիճակին, որպեսզի բոլոր մարզիկները լինեն լավագույն մարզավիճակում և չհիվանդանան: Հաճախ է լինում, որ գնում ենք ինչ-որ մրցաշարի, մեկը հիվանդանում է, և մրցաշարը ձախողվում է:
– Ձեր առաջին էմոցիաները՝ հաղթողի մրցանակը ստանալուց հետո:
– Ուրախություն, թեթևություն:
– Ի՞նչ ասացիք մեկմեկու: Օրինակ՝ Դուք, Ձեզ ի՞նչ ասացին:
– Շատ ուրախ ենք, որ կրկին կարողացանք մրցանակ նվաճել. վերջին երկու թմային մրցաշարերում ոչ մի հաջողություն չունեինք, և արդեն սկսել էինք անհանգստանալ՝ մի՞թե այլևս չենք կարողանում շախմատ խաղալ:
– Դուք ցանկանում եք հաղթել բոլո՞ր թիմային մրցաշարերը։
– Իմ կարծիքով, մենք ի վիճակի ենք: Եվ՝ ոչ միայն իմ կարծիքով. բոլոր տղաները հասկանում են, որ թիմային մրցաշարերում մենք պետք է լինենք այն թիմերից մեկը, որը միշտ պայքարելու է հաղթելու համար: Այն ժամանակ, երբ մենք հաղթեցինք օլիմպիադայում, չէինք ցանկանում որևէ բան փոփոխել, իսկ այս անգամ որոշեցինք ամեն ինչ վերանայել: Փոխեցինք անգամ մրցաշարի նախապատրաստական հավաքի վայրը, և, փաստորեն, արդյունավետ ստացվեց: Սերգեյ Մովսիսյանը նույնպես չափազանց հաջող միացավ թիմին, ֆիզպատրաստվածության մարզիչը նույնպես նորարարություն էր, և ինձ թվում է՝ այս ամենը մեզ շատ օգնեց:
– Դե, իհարկե, թիմի առաջատարը իր տեղում էր:
– Գիտե՞ք՝ երբ ինչ-որ մեկը նման տիեզերական վարկանիշ ունի, նշանակում է, որ նա պետք է խաղա իր վարկանիշի համաձայն: Նախորդ օրը ես այդ կապակցությամբ լավ օրինակ բերեցի մեր ֆիզպատրաստվածության մարզիչ Արմենի հետ զրույցում. պատկերացրեք՝ եկել է որևէ հանրահայտ վիրաբույժ և վիրահատություն կատարել: Ի՞նչ, բոլորը պետք է շնորհավորե՞ն նրան: Նույն իրավիճակն այստեղ է: Իմ կարգավիճակն այնպիսին է, որ պարտավոր եմ լավ խաղալ, և ես դա անում եմ առանց առանձնակի զարմանքի: Փորձում եմ յուրաքանչյուր պարտիայում լավ խաղալ: