Առողջապահության համաշխարհային կազմակերպության (ԱՀԿ) առողջապահական ոլորտի արտակարգ իրավիճակների ծրագրի տնօրեն Մայքլ Ռայանը կասկածում է, որ մարդկությունը մոտ ապագայում կարող է հավաքական իմունիտետ ձեռք բերել կորոնավիրուսի նկատմամբ: Նա նման կարծիք է հայտնել ճեպազրույցի ընթացքում, փոխանցում է ՏԱՍՍ-ը:
Նրա խոսքով, կազմակերպությունը չգիտի, թե Երկրի բնակչության որ մասը պետք է հիվանդանա COVID-19-ով, որպեսզի հնարավոր լինի խոսել հավաքական իմունիտետի առաջացման մասին: Գիտնականների մեծ մասը կարծում է, որ դա բնակչության 60-80 տոկոսն է, հայտարարել է Ռայանը, իսկ մյուսները կարծում են, որ այդ թիվը կարող է ավելի փոքր լինել:
ԱՀԿ ներկայացուցիչը նշել է, որ կորոնավիրուսը դեռ երկար ժամանակ «կվառի մեր հասարակությունը», նախքան հավաքական իմունիտետի ի հայտ գալը: Ըստ Ռայանի, այն գաղափարը, որ նպատակը պետք է լինի հավաքական իմունիտետի ձեռքբերումը, ինչ-որ իմաստով հակասում է հիվանդության վերահսկմանը: «Եվ ի՞նչ կտեսնեինք մենք այդ ժամանակ: Գերծանրաբեռնված հիվանդանոցներ, բազմաթիվ մահեր»,- պարզաբանել է նա:
Ռայանը ուշադրություն է հրավիրել այն փաստի վրա, որ հաճախ մարդիկ, որոնք հիվանդացել են COVID-19-ով, ապաքինվելուց հետո դեռ զգալի ժամանակ շարունակում են վատ զգալ: Սա վերաբերում է նաև երիտասարդներին, ովքեր, որպես կանոն, հեշտ են տանում հիվանդությունը: