Վերջին օրերին ամենաշատ քննարկվող թեմաների շարքում է Հայաստանի վարչապետ Նիկոլ Փաշինյանի տված հարցազրույցը ռուսական «RBK» հեռուստատեսությանը, որտեղ հիմնականում արտաքին քաղաքականությանն առնչվող հարցեր ու պատասխաններ են հնչել, բայց անկասկած է, որ դրանք խթանելու էին նաև ներքաղաքական տրամադրություններ։
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Սարգիս Խանդանյանը, վերլուծաբաններ Հակոբ Բադալյանը և Արիս Վաղարշակյանը:
Եթե ներքաղաքական տրամադրությունները Տավուշի սահմանային լարվածությամբ ու դեպքերով գնահատենք, ի՞նչն է հատկապես ուշադրության արժանի: Անդրադառնալով այս հարցին՝ Հակոբ Բադալյանը նշեց. «Մենք տեսանք ռազմական և ռազմաքաղաքական զարգացում և բացարձակ անհամարժեք բովանդակություն Հայաստանի ներքաղաքական կյանքում. Հայաստանի ներքաղաքական կյանքը կարծես թե ծրագրված է միայն սոցիալական հարցերի շուրջ կառուցվելու համար, իսկ երբ լինում են ծանրակշիռ քաղաքական օրակարգային հարցեր, տեսնում ենք քաղաքական դերակատարների բացարձակ մեծամասնության անհամարժեքություն և անբովանդակություն… Մենք տեսանք ավանդական ցածրարժեք քարոզչական տեխնոլոգիաների կիրառում, չի եղել լուրջ հայեցակարգային մոտեցում այն ամենի շուրջ, ինչով զբաղված էր ռազմաքաղաքական ղեկավարությունը, բանակը: Քաղաքական տեքստեր հրապարակ բերելու փոխարեն տեսնում ենք հռչակագրային տեքստեր Թուրքիայի և Ադրբեջանի վերաբերյալ, և կենացներ հայ-ռուսական բարեկամական հարաբերությունների կարևորության մասին, բայց դա քաղաքականություն չէ»: Վերլուծաբանի խոսքով՝ տավուշյան լարվածությունը քաղաքական ուժերի համար իշխանությունների վրա հարձակման առիթ չէր:
Սարգիս Խանդանյանը նկատեց, որ իշխանությունների վրա որոշ ուժեր հարձակվում են նաև առանց առիթի: Նրա դիտարկմամբ՝ արտաքին քաղաքականության, ղարաբաղյան հակամարտության և տարածաշրջանային հարաբերությունների վերաբերյալ քաղաքական դաշտում բազմակարծություն չկա, նաև փորձագիտական մակարդակում ակտիվ քննարկումներ տեղի չեն ունենում:
Արիս Վաղարշակյանի դիտարկմամբ՝ տավուշյան լարվածության մի քանի օրերը բացահայտեցին ընդդիմության թշվառությունը. «Ընդդիմությունը լիակատար ֆիասկո ապրեց, երկու տարի շարունակ խնամքով միֆեր էին կառուցում հող հանձնելու, ստվերային պայմանավորվածությունների, դավաճանության մասին… Դա ընդամենը ռեևանշիստների ձախողված քարոզչություն էր, իսկ Տավուշյան դեպքերը, դրան հաջորդած արտաքին քաղաքական իրադարձությունները ակնհայտ դարձրին այդ միֆերի սնանկությունը: Մեր դժբախտությունն այսպիսի ընդդիմություն ունենալն է, որը քննադատության ձողն ավելի է իջեցրել»:
Մանրամասն՝ տեսանյութում: