Թուրքիայի Ազգային մեծ ժողովն ընդունել է օրինագիծ օտարերկրյա սոցիալական ցանցերի նկատմամբ վերահսկողության ուժեղացման մասին: Հուլիսի 29-ին այդ մասին հաղորդել է NTV հեռուստաալիքը:
Հեռուստաալիքի տվյալներով՝ սույն որոշումն օտարերկրյա ընկերություններին, մասնավորապես, Facebook-ին, Twitter-ին, Instagram-ին, կպարտավորեցնի բացելու իրենց ներկայացուցչությունները Թուքիայում: Այդ իրավական անձինք պատասխանատվություն կկրեն իրենց հարթակներում հակաիրավական կոնտենտի հրապարակման համար:
Դրանք նաև պարտավոր կլինեն միջոցներ ձեռնարկելու նման տեղեկատվության տարածումը կանխարգելելու համար: Եթե ընկերությունները հրաժարվեն Թուրքիայում ներկայացուցչություններ բացելուց, ապա Անկարան մտադիր է սահմանափակել սոցիալական ցանցերից օգտվելու հնարավորությունն, ընդհուպ մինչև Թուրքիայում դրանցից օգտվելու լիակատար արգելումը: Սույն օրինագծի նախաձեռնողներ են հանդես եկել կառավարող Արդարության և զարգացման կուսակցությունը և Ազգային շարժման կուսակցությունը:
Կառավարող վերնախավի կողմից օտարերկրյա սոցցանցերի քննադատության տարափն սկսվել է հունիսի վերջին այն բանից հետո, երբ Թուրքիաի ֆինանսների և գանձապետարանի նախարար Բերաթ Ալբայրաքը, որը նաև Թուրքիայի նախագահ Թայիփ Էրդողանի փեսան է, Twitter-ում հաղորդագրություն է հրապարակել չորրորդ երեխայի ծնվելու մասին: Բացի դրականից, այն ստացել է բազմաթիվ բացասական մեկնաբանություններ, հաղորդել է ՏԱՍՍ-ը: