Թուրքիայի նախագահի խոսնակ Իբրահիմ Քալընը «CNNTurk»-ի եթերում խոսել էէ հայ-ադրբեջանական լարվածության մասին։
«Այստեղ Հայաստանն է բռնազավթող կողմը։ Մեր նախագահը այդ մասին նախօրեին հաղորդել է նաև հարգելի Պուտինին», – հայտարարել է Քալընը՝ հավելելով, որ Էրդողանը Պուտինից խնդրել է լարվածությունը թուլացնելու համար օգտագործել Հայաստանի հետ իր կապերը։
Հիշեցնելով, որ Ռուսաստանը Հայաստանի հետ զորավարժություն է անցկացրել, Էրդողանի խոսնակը նշել է, որ այժմ Թուրքիան է Ադրբեջանի հետ զորավարժություն անցկացնում, քանի որ երկու երկրների միջև ռազմական անվտանգության և համագործակցության պայմանագիր կա։
Հերթական անգամ աջակցություն հայտնելով Ադրբեջանին՝ Քալընը նշել է․ «Ադրբեջանի նկատմամբ սպառնալիքը որտեղից էլ որ լինի՝ Հայաստանի, թե Ռուսաստանի կողմից, միևնույնն է, Թուրքիան կշարունակի Ադրբեջանի կողքին լինել։ Սակայն սա չի նշանակում, թե մենք փակում ենք դիվանագիտության դռները, այլ ճիշտ հակառակը։ Երեկ մեր նախագահի հեռախոսազրույցի պատճառն ու առանձնահատկությունը հենց դա էր։ Կարող եմ ասել, որ Պուտինի հետ զրույցում բավականին լավ արդյունք ենք արձանագրել»։
Թուրքիայի նախագահի խոսնակը հավելել է, որ կողմերը համաձայնության են եկել՝ լարվածությունը թուլացնելու համար համատեղ քայլեր ձեռնարկելու, կողմերին անհրաժեշտ առաջարկները անելու և վայրկյան առաջ բանակցությունները վերսկսելու շուրջ։ «Աստված տա մոտակա օրերին այս համաձայնության արդյունքները տեսնենք»։
