Արտակարգ դրության պայմաններում կառավարման համակարգին առնչվող մի շարք հարցերի և այդ հարցերի վրա համավարակի ազդեցության շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Ռուստամ Բաքոյանը, կառավարման հարցերի փորձագետ, «Հանուն հանրապետության» նախաձեռնության անդամ Հայկ Այվազյանը, կառավարման հարցերի փորձագետ Կարեն Սարգսյանը:
Կառավարությունը համավարակի դեմ պայքարում ընտրեց թիրախային միջամտության մոդելը: Արդեն հինգ ամիս է Հայաստանն արտակարգ դրության պայմաններում է ապրում, կառավարությունը նախաձեռնել է 22 միջոցառում. արդյո՞ք այդ միջոցառումներն արտահայտում են կառավարման արդյունավետությունը:
Կարեն Սարգսյանի խոսքով՝ ծրագրերի արդյունավետությունը հնարավոր է գնահատել միայն կարճաժամկետ առումով, բավականին երկար ժամանակ է պետք, որպեսզի երկարաժամկետ առումով հնարավոր լինի գնահատել. «Սկզբնական փուլում դժգոհություն եղավ, քանի որ արագ լուծումեր էին անհրաժեշտ, մինչդեռ որոշակի հետաձգումներ տեղի ունեցան, ճգնաժամային պայմաններում դա անխուսափելի է, այնուամենայնիվ, ռիսկերը մեղմացնելուն միտված գործիքակազմեր կիրառվեցին»: Կ. Սարգսյանի դիտարկմամբ՝ աջակցման ծրագրերի իրականացման ժամանակ նկատելի էին կառվարման համակարգի որոշակի բացեր, մասնավորապես նախկինում մշակված տվյալների բազա չկար և աջակցության ծրագրերը թիրախային և հասցեական չիրականացվեցին:
Ռուստամ Բաքոյանը հավելեց, որ կառավարության ձեռնարկած բոլոր ծրագրերը հիմնականում հաջողել են: «Կառավարությունն աշխատում է առկա խնդիրները լուծելու ուղղությամբ»:
Հայկ Այվազյանի դիտարկմամբ՝ ճգնաժամը դեռ իր ամբողջ էությունը ցույց չի տվել:
Կարեն Սարգսյանի խոսքով՝ նախատեսված արմատական ռեֆորմների մի մասը սառեցված են. «Օրինակ՝ եթե կառավարությունը նախատեսել էր զարգացման ծրագրեր իրականացնել, հիմա արտակարգ դրության պայմաններում առաջացած խնդիրները լուծելուն միտված ծրագրեր են իրականացվում:
Քննարկման մասնակիցների դիտարկմամբ՝ դժվար 2021թ. է սպասվում: Ռուստամ Բաքոյանի խոսքով՝ կառավարության որդեգրած ռազմավարությունը, համավարակով պայմանավորված, փոփոխությունների է ենթարկվել և դեռ ենթարկվում է:
Անդրադառնալով դիտարկմանը, որ նոր իշխանությունը արտակարգ դրության պայմաններում միջոցառումներ է ձեռնարկում, բայց հանդիպում է մեծ դիմադրության, Հայկ Այվազյանն նշեց. ««Սև խաղացողների» ակտիվությունը իշխանության դանդաղկոտության, վախվորածության հետևանք է… «Իշխանության միակ ճիշտ ճանապարհը հեղափոխական օրակարգն է»,- ընդգծեց Հայկ Այվազյանը:
Մանրամասն՝ տեսանյութում:
