Թուրքիայի նախագահ Ռեջեփ Թայիփ Էրդողանը Միջերկրական ծովի արևելքում Թուրքիայի նավթագազային գործունեության շուրջ ստեղծված իրադրության կապակցությամբ կողմ է արտահայտվել նման ակտիվության ժամանակավոր դադարեցմանը: Այդ մասին հուլիսի 28-ին հայտնել է նախագահի քարտուղար Իբրահիմ Քալընը: Ավելի վաղ Թուրքիայի նման գործունեությունը հունական կղզիների մերձակայքում առաջացրել է Աթենքի քննադատությունը: Այսպես, հուլիսի կեսերին Հունաստանի ԱԳ նախարար Նիկոս Դենդիասը ցանկություն է հայտնել, որ ԵՄ-ի գծով գործընկերները տնտեսական պատժամիջոցներ պատրաստեն Անկարայի դեմ այն դեպքում, երբ Թուրքիան շարունակի նավթի ու գազի հորատումն այս շրջանում:
«Եկեք հետևենք կառուցողական մոտեցմանը և դադարեցնենք դա (հորատումը)»,-հուլիսի 28-ին Էրդողանի խոսքը փոխանցել է Քալընը: Միևնույն ժամանակ Քալընը Հունաստանին կոչ է արել Թուրքիայի հետ խնդիրները լուծել երկկողմ հիման վրա՝ գործընթացին չներքաշել այլ երկրների: «Հունաստանի համար հնարավոր չի լինի արդյունքների հասնել՝ ԵՄ-ին իր անդամակցությունն օգտագործելով որպես ճնշման միջոց»,-նշել է նա: Ավելի վաղ ԵՄ-ի երկրների արտաքին գործերի նախարարները Թուրքիային քննադատության էին ենթարկել Միջերկրական ծովի արևելյան ջրերում նավթի ու գազի հորատման կապակցությամբ՝ հաղորդել է «Ինտերֆաքս»-ը։
