Այսօր մշակույթի գործիչները` գրողներ, դերասաններ, նկարիչներ, քանդակագործներ, կոմպոզիտորներ, ճարտարապետներ ակցիա էին կազմակերպել Երևանի Կոնսերվատորիայի դիմաց` Կոմիտասի արձանի մոտ, ի պաշտպանություն «Հայկական ժամանակ» օրաթերթի գլխավոր խմբագիր Նիկոլ Փաշինյանի:
Կազմակերպված ստորագրահավաքին ներկա էին դերասաններ Վարդուհի Վարդերեսյանը, Աշոտ Ադամյանը, Երվանդ Մանարյանը, քաղաքագետ Հմայակ Հովհաննիսյանը, Աշոտ Բլեյանը և մի քանի տասնյակ մտավորականներ:
«Մեր երկրում ոչ մի քաղաքական բանտարկյալ չպետք է լինի, ոչ միայն Նիկոլ Փաշինյանը, մյուսները ևս պետք է ազատվեն: Մենք դեռ մեր հույսը չենք կտրում, այլապես նմանատիպ ակցիաները շատ երկար կշարունակվեն: Մենք պետք է շարունակենք պայքարը, մինչև այդ մարդիկ դուրս գան բանտից»,-ասաց սիրված դերասանուհի Վարդուհի Վարդերեսյանը:
Քաղաքագետ Հմայակ Հովհաննիսյանն էլ նշեց, որ յուրաքանչյուր մտավորական պետք է իր ձայնը բարձրացնի, երբ լրագրողին, երբ թերթի խմբագրին, երբ հրապարակախոսին դարձնում են հալածյալ, դարձնում են բանտարկյալ, երբ սահմանափակում են նրա գործունեության հնարավարությունները:
«Նիկոլը մեր կարիքը չի զգում, մենք ենք նրա կարիքը զգում, մենք նրա բնավորության կարիքն ունենք, մենք պետք է նրա ստվերի տակ մեզ լավ զգանք, մենք պետք է ամոթ զգանք, որ մեր երկիրն այս վիճակի մեջ է»,- ասաց դերասան Երվանդ Մանարյանը: