Բուլղարիայում արդեն 19-րդ օրն է ինչ շարունակվում են բողոքի ցույցերը, ցուցարարները պահանջում են Վարչապետ Բոյկո Բորիսովի կառավարության, ինչպես նաև հանրապետության գլխավոր դատախազ Իվան Գեշևի հրաժարականը:
Ըստ տեղական ոստիկանության հաղորդած տվյալների, բողոքի ակցիայի ընթացքում, որը տեղի է ունեցել հուլիսի 27-ին Սոֆիայում, ցուցարարների և ոստիկանության միջև անկարգություններ կամ բախումներ տեղի չեն ունեցել: Բուլղարիայի մայրաքաղաքի փողոցներում երթևեկությունը մասամբ արգելափակված է եղել:
Բողոքի ցույցերը սկսվել են ավելի քան երկու շաբաթ առաջ, դրանց մասնակիցները մեղադրում են կառավարությանն ու երկրի գլխավոր դատախազին համատարած կոռուպցիայի և օլիգարխներին հովանավորելու համար: Ի պատասխան վարչապետ Բոյկո Բորիսովը անցած շաբաթ պաշտոնանկ էր արել կաբինետի մի շարք անդամների, այդ թվում` ներքին գործերի և էկոնոմիկայի նախարարներին, միաժամանակ հայտարարել, թե անձամբ հրաժարական ներկայացնելու մտադրություն չունի: