Իտալական Ջիլիո կղզու 800 բնակիչներից ոչ մեկը, համավարակի սկզբից ի վեր, չի բողոքել COVID-19-ի ախտանիշների ի հայտ գալուց, չնայած հիվանդության տարածման համար նպաստավոր պայմաններին, հաղորդում է Fox News-ը:
Կղզու բնակիչները մշտապես շփման մեջ են նավահանգստի մերձակայքի նրբանցքներում կամ խիտ դասավորված տների միջև նեղ փողոցներում:
Կղզու միակ բժիշկ դոկտոր Արմանդո Շիաֆինոն խիստ անհանգստացած էր կորոնավիրուսի հավանական բռնկումից: Բժիշկի խոսքով, վարակիչ հիվանդությունները, ինչպիսիք են քութեշը, կարմրուկը, խոզուկը կամ ջրծաղիկը, մի քանի օրվա ընթացքում տարածվում են ամբողջ կղզում:
Միլանի համալսարանի մամոլոգ Պաոլա Մուտին, որը նաև համաճարակաբանություն է դասավանդում, որոշել է պարզել, թե ինչու այս անգամ ոչ ոք չի վարակվել:
Ջիլիոյում կորոնավիրուսով առաջին հիվանդը եղել է 60-ամյա մի տղամարդ, որը կղզի է ժամանել փետրվարին: Նա մասնակցել է ազգականի հուղարկավորությանը և, ըստ Մուտիի, անընդհատ հազացել է: Նույն օրը նա լաստանավով վերադարձել է մայրցամաք և երեք շաբաթ անց մահացել հիվանդանոցում:
Մի քանի շաբաթ անց կղզի են ժամանել ևս երեք վարակակիր հյուրեր, որոնք նույնպես ակտիվ շփվել են տեղի բնակիչների հետ:
Եղել են նաև այլ դեպքեր, երբ կորոնավիրուսով վարակված մարդիկ են ժամանել կղզի: Սակայն այդպես էլ տեղի բնակիչներից ոչ մեկը չի հիվանդացել: Կղզու 800 բնակիչներից 723-ը համաձայնել են հակամարմինների առկայության թեստ հանձնել, որոնք հայտնաբերվել են միայն մեկ տարեց իտալացու մոտ:
Պաոլա Մուտին դեռևս չի պարզել, թե ինչու ոչ ոք չի վարակվել, բայց նա նախատեսում է ուսումնասիրություն գրել այս թեմայի շուրջ: Ըստ նրա ենթադրության՝ կղզաբնակները պարզապես չեն ենթարկվում կորոնավիրուսի ազդեցությանը:
