ABC հեռուստաընկերության «Բարի լույս, Ամերիկա՛» հաղորդման ընթացքում ամերիկահայ հայտնի գործարար, Moderna ընկերության համահիմնադիր և նախագահ Նուբար Աֆեյանը խոսել է կորոնավիրուսի դեմ պատվաստանյութի փորձարկումների մասին: Ընկերության կողմից մշակվող պատվաստանյութն այսօրվանից անցել է փորձարկումների երրորդ փուլին:
Առաջիկա ամիսների հետազոտություններից հետո ԱՄՆ-ի Սննդի և դեղերի վարչությունը կորոշի պատվաստանյութի անվտանգությունն ու արդյունավետությունը՝ նախքան կթույլատրվի դրա զանգվածային օգտագործումը:
«Սննդի և դեղերի վարչությունը նման վճիռ կարող է կայացնել այս տարվա վերջին կամ մյուս տարի: Դա կախված կլինի մեր փորձարկումների ընթացքից: Անշուշտ, մենք փորձարկումներ կանենք այն հատվածներում, որտեղ վիրուսի զգալի տարածում կա, որպեսզի արագ տեսնենք՝ արդյոք մենք ապահովում ենք անհրաժեշտ պաշտպանությունը… Միայն լայնամասշտաբ փորձարկումներից հետո հնարավոր կլինի պարզել՝ արդյոք վիրուսի որոշ չափաբաժին ստանալով՝ մարմնի իմունային համակարգը կպաշտպանի դրանից այնպես, ինչպես վիրուսով հիվանդացած մարդու դեպքում, ինչպես օրինակ՝ գրիպի դեպքում, թե՞ պատվաստվելուց հետո մեր օրգանիզմի վրա վիրուսի ազդեցությունը շատ փոքր կլինի»,- ասել է Նուբար Աֆեյանը: