Իտալական Կամպանիա նահանգում հաճախորդների կողմից դիմակներ կրելու պահանջին չհետևող բիզնեսի համար տուգանքների չափն ավելացրել են մինչև 1.000 եվրո, հաղորդում է The Local-ը:
Սալերնո քաղաքում գործող ձեռնարկություններն առաջինն են ընկել նոր տուգանքների տակ:
Երեք հաստատություններ, այդ թվում բար և վարսավիրանոց, տուգանվել են 1000-ական եվրոյով, քանի որ ոստիկանությունը հայտնաբերել է, որ նրանք չեն պահպանում փակ տարածքներում դիմակ կրելու պայմանը:
«Եթե մեր համաքաղաքացիները կարծում են, որ խնդիրը լուծված է, դա նշանակում է, որ մի քանի շաբաթից մենք կվերադառնանք լուրջ արտակարգ իրավիճակի»,- ասել է Կամպանիայի նահանգապետ Վինչենցո Դե Լուկան:
Պաշտպանիչ դիմակները պարտադիր են սուպերմարկետներում, բարերում, ռեստորաններում, խանութներում, ինչպես նաև հասարակական տրանսպորտում:
Բացի 1000 եվրո տուգանքից, բիզնեսը կարող է փակվել 5-ից 30 օր ժամկետով: