Առնվազն 45 մարդ է ձերբակալվել ամերիկյան Սիեթլ քաղաքում տեղի ունեցած անկարգությունների ընթացքում, հայտնում է «ՌԻԱ Նովոստին»՝ վկայակոչելով տեղի ոստիկանությանը:
Նրա խոսքով՝ վիրավորվել են առնվազն 21 իրավապահ:
Ավելի վաղ հաղորդվել էր 25 ձերբակալվածի և երեք վիրավոր ոստիկանի մասին:
Ընդդեմ ռասիզմի ելած ցուցարարները հրդեհել են ձերբակալված անչափահասների համար կառուցապատվող վայրի շինարարական վագոն-տնակը, նաև փորձել են պայթեցնել ոստիկանության բաժանմունքի պատերը: Դրանից հետո քաղաքի իշխանությունները անկարգությունները հայտարարեցին խռովություն:
Ներկայում արևմտյան երկրներում զանգվածային բողոքի ցույցեր են անցկացվում սևամորթների իրավունքների պաշտպանության համար, որոնք սկսվել են աֆրոամերիկացի Ջորջ Ֆլոյդի մահից հետո։ Նրան Մինեապոլիսի ոստիկանությունը կալանավորել էր մայիսի 25-ին: Ձերբակալման ընթացքում ոստիկանը ծնկով սեղմել է տղամարդու պարանոցը: Ֆլոյդը բղավել է, թե խեղդվում է, բայց իրավապահները դրան ուշադրություն չեն դարձրել: Տղամարդը մահացել է վերակենդանացման բաժանմունքում։