Լեդի Դիի նամակը, որը գրել էր իր 30-ամյակի օրը, աճուրդի է հանվել: Ամուսնալուծությունից մեկ և մահից վեց տարի առաջ արքայադուստրը մարգարեաբար հարցնում է, թե «ի՞նչ են բերելու առաջիկա 10 տարիները» իրեն:
Հաղորդագրությունն ուղղված է Դիանայի մտերիմ ընկեր Դադլի Պոպլակին: Նամակում նա շնորհակալություն է հայտնում նվերների՝ Պոպլակի՝ արքայադստեր տարեդարձի առթիվ արած երեք լուսանկարի համար:
«Հետաքրքիր է, ի՞նչ է բերելու գալիք տասնամյակը: Անցած տասը տարիների ընթացքում շատ հետաքրքիր բաներ եմ սովորել: Շնորհակալ եմ Դադլիին իմ լուսանկարների և իմ սիրո համար»,- գրել է նա:
Հայտնի է, որ նամակը գրված է Քենսինգթոնյան պալատի պատկերանշանի կնիքով թղթի վրա: Այն վաճառքի է հանել նեղ շրջապատում հայտնի, ինքնագրերի և ձեռագրերի պաշտոնաթող մի կոլեկցիոներ:
Daily Mail-ը նշում է, որ կոլեկցիոները Դիանայի ևս մեկ ձեռագիր ունի՝ ուղղված մորը՝ Ֆրենսիս Շանդ-Քիդին: Երկու նամակն էլ 600 ֆունտով աճուրդի կհանվեն հուլիսի 30-ին:
1991 թ. հուլիսի 1-ին (նամակի ամսաթիվը) Դիանան դարձավ 30 տարեկան: Մեկ տարի անց նա կբաժանվի արքայազն Չարլզից, բայց զույգը պաշտոնապես կամուսնալուծվի միայն 1996 թվականին: Մեկ տարի անց, արքայազններ Ուիլյամի և Հարիի մայրը կմահանա ավտովթարից:
