Ժամանակին, երբ ներդրվեց քննությունների միասնական համակարգը, կոռուպցիոն շատ մեխանիզմներ վերացան։ Սակայն այսօր անհրաժեշտություն կա վերանայելու այդ համակարգը։ Վերանայելու երկու ճանապարհ կա։ Առաջին՝ բուհին տալ իր ընդունելությունը կազմակերպելու հնարավորություն, երկրորդ՝ ավագ դպրոցներում ներդնել կրեդիտային համակարգ։ Այս մասին «Առաջին լրատվական»-ի հետ զրույցում ասաց կրթության փորձագետ Անահիտ Բախշյանը։
Անդրադառնալով այս տարի կորոնավիրուսային իրավիճակով պայմանավորված միասնական քննությունների անցկացման կարգին ու դրանից առաջացած դժգոհությանը՝ Բախշյանը նշեց, որ դիմորդները արդարացի են բողոքում, քանի որ շատ անարդար է, երբ առաջին հայտի պայմանը դառնում է դոմինանտ։
«Անհեթհեթ է, որ 18,5 միավորով դիմորդը դուրս է մնում երկրորդ հայտով, իսկ 7,5 հավաքած դիմորդն առաջին հայտով անցնում է։ Այս համակարգը նոր չէ ու իրեն սպառել է մինչև վերջ։ Սրա լուծումը, իմ կարծիքով, բուհերին հնարավորություններ տալն է ինքնուրույն կազմակերպելու ընդունելության քննությունները, ինչպես նախկինում էր։
Մենք ե՞րբ անցանք միասնական համակարգի. երբ կոռուպցիան հասել էր գագաթնակետին։ Այդ ժամանակ միասնական քննությունները ինչ-որ չափով մեղմեցին իրավիճակը, զտում արեցին։ Հիմա կարծես թե չենք խոսում կոռուպցիայի մասին։ Բուհը բոլորովին չի մասնակցում ընդունելության ընթացքին։ Այն դեպքում, երբ, իմ կարծիքով, բուհը պետք է դնի անցողիկ շեմ և ընդունի։ Գիտե՞ք հիմա ինչ վիճակ է։ Ոնց որ քանդակագործին տաս փխրուն, անպետք քար ու ասես՝ մնայուն բան ստեղծիր, արժեք ստեղծիր։ Չի լինի, չէ՞։ Հիմա բուհի ձեռքերը ամբողջությամբ կտրված են գործընթացից։ Դրա համար հիմա այդպիսի աբսուրդ վիճակի մեջ ենք հայտնվել։ Կա՛մ պետք է բուհին տրվի քննությունն անցկացնելու և մրցույթի շեմը սահմանելու իրավունքը, կա՛մ ավագ դպրոցներում ներդրվի կրեդիտային համակարգը, որն օրենքով ամրագրված է»,- մանրամասնեց Անահիտ Բախշյանը։
Ոլորտի մասնագետի խոսքով՝ եթե ավագ դպրոցներում ճիշտ ներդրվի կրեդիտային համակարգը, ճիշտ կատարվեն կրթական ռեֆորմները՝ օգտագործելով արտասահմանի փորձը, ապա ավագ դպրոցի աշակերտը կկարողանա իր ունեցած կրեդիտներով դիմել տարբեր բուհեր և ընդունվել այնտեղ, որտեղ համապատասխանում է։ «Այդ դեպքում բացառված կլինի, որ 7,5 կամ 8 միավոր ստացած շրջանավարտը ընդունվի բուհ։ Ինչքան էլ ծնողներն ասում են՝ խառնված են եղել, հուզված են եղել, դա բոլորովին հիմնավոր չէ, 7,5-8 ստացողը չպետք է հայտնվի բուհում։ Ես իրավիճակի կարգավորման այս երկու ճանապարհը գիտեմ։ Բուհին պետք է տալ մրցութային շեմը սահմանելու իրավունք»,- ընդգծեց Անահիտ Բախշյանը։
Մեր զրուցակիցը դրական է համարում այն, որ բուհ ընդունելության հարցում նախապատվությունը տրվում է առաջին հայտով ընդունվել ցանկացող դիմորդներին, բայց մյուս կողմից էլ՝ ստեղծված պատկերը ցույց տվեց, թե ինչ վատ հետևանքներ եղան դրանից, ու դիմորդների ծնողների արդարացի բողոքը հենց այդ մասին է։ «Այո, դա էլ է իրավացի։
Եթե մարդը որոշել է դառնալ բժիշկ, նա չպետք է հայտնվի անասնաբուժականում կամ քիմիականում։ Այդ ընտրությունը պետք է թողնվի շրջանավարտին։ Իր հավաքած կրեդիտներով ու միավորներով թող ինքը որոշի, թե որտեղ է ուզում ընդունվել։ Թող մի քանի բուհ ուղարկի, ինչպես դրսում է արվում, տարբեր բաղադրիչներ հաշվի առնելով ընդունվի։ Թե չէ ուզում էին լավ բան անել, բայց ստացվեց՝ ինչպես միշտ։ Շատ անարդար է»,- իր խոսքն ամփոփեց Անահիտ Բախշյանը։
Լուսանկարը՝ panorama.am-ի
