Ռուսաստանի Պետդումայի ԱՊՀ երկրների հետ աշխատանքի կոմիտեի նախագահ Լեոնիդ Կալաշնիկովը ադրբեջանական APA գործակալությանը տված հարցազրույցում հայտարարել էր, թե Լեռնային Ղարաբաղի հակամարտության կարգավորման հետ կապված մինչ օրս մի շարք սխալներ են թույլ տրվել, որոնց պատճառով հակամարտությունն արդեն 30 տարի է չի լուծվում: Կալաշնիկովի կարծիքով՝ այդ սխալներից մեկն այն է, որ հակամարտության կարգավորումը հանձնարարված է հենց ԵԱՀԿ Մինսկի խմբին: Ինչպես նաև, Կալաշնիկովի խոսքերով, Մինսկի խումբը Արևմուտքի ցանկությամբ ստեղծված ֆորմատ էր:
«Այսօր մենք լսում ենք Մինսկի խմբին ներգրավելու կոչեր ՝ սահմանին լարվածությունը կայունացնելու համար։ Ես դժվարանում եմ հասկանալ, թե ինչով էր զբաղվում Մինսկի խումբն այդ ժամանակ։ Ինչ է արել այդ կազմակերպությունն այս 30 տարիների ընթացքում։ Ճիշտն ասած՝ ոչինչ: Հակամարտության կարգավորման միակ ճանապարհն այն է, որ երեք պետությունների ՝ Ռուսաստանի, Հայաստանի և Ադրբեջանի առաջնորդները հանդիպեն և արմատապես լուծեն այդ հարցը: Ես այլ լուծում չեմ տեսնում։ Ես ռազմական ճանապարհով հակամարտության լուծում չեմ տեսնում։ ԵԱՀԿ Մինսկի խումբը շահագրգռված չէ այդ հակամարտության կարգավորմամբ։ Դրա համար ոչ մի օգուտ չկա նրանց գործունեությունից, ավելի ճիշտ՝ նրանց անգործությունից»,-մասնավորապես ասել էր Լեոնիդ Կալաշնիկովը:
«Առաջին լրատվական»-ի հետ զրույցում քաղաքագետ Գարիկ Քեռյանը անդրադառնալով Կալաշնիկովի վերոնշյալ հայտարարություններին՝ նշեց, որ սա ռուսական իշխանության ադրբեջանամետ թևի ներկայացուցիչներից մեկի տեսակետն է, որը, սակայն, չպետք է դիտարկել որպես պաշտոնական Մոսկվայի ամենավերին օղակների դիրքորոշում, բայց միևնույն ժամանակ՝ դրանք չպետք է նաև անտեսել: Քաղաքագետը համոզված է, որ յուրաքանչյուր նմանատիպ հայտարարության մեջ պետք է փորձենք գտնել արմատներն ու դրանից բխող վտանգները:
Ինչ վերաբերում է ԵԱՀԿ Մինսկի խմբի անգործության վերաբերյալ Կալաշնիկովի մեղադրանքներին, ապա մեր զրուցակիցն այս հարցում մասնակիորեն համաձայն է ռուս պաշտոնյայի հետ՝ իր հերթին նկատելով, որ այո՛, թեև Մինսկի խումբն աշխատում է հակամարտության կարգավորման ուղղությամբ, որոշակի ջանքեր է գործադրում բանակցությունների վարման առումով և Հայաստանի ու Ադրբեջանի միջև եռանախագահող երկրների անունից հանդես է գալիս որպես միջնորդ կազմակերպություն, սակայն նրանց քայլերը բավարար չեն, ավելին՝ որոշ դեպքերում անգամ անարդյունավետ են: Այսուհանդերձ, Քեռյանը չի կարծում, որ ԵԱՀԿ Մինսկի խմբին, համենայնդեպս, ներկա դրությամբ՝ պետք է փոխարինող այլ ձևաչափ գտնել:
Անդրադառնալով նաև Կալաշնիկովի հնչեցրած այն խոսքին, թե «ես շատ լավ եմ հասկանում հասարակ ադրբեջանցիների ցավը՝ երկրի տարածքային ամբողջականության հետ կապված», մեր զրուցակիցը ընդգծեց, որ քաղաքական իմաստով՝ սա տհասություն է:
«Կալաշնիկովը երևի խավիար է կերել, հավանաբար, թանկարժեք խավիարներից է կերել, որ այդպիսի «Ճ կլասի» մտքեր է հնչեցնում, որովհետև ինչպե՞ս կարելի խոսել տարածքային ամբողջականության մասին, եթե դու քաղաքական գործիչ ես և չգիտես, որ տարածքային ամբողջականությանը հավասարազոր միջազգային սկզբունք է նաև ազգերի ինքնորոշման իրավունքը: Սա հակապետական հայտարարություն է, որով նա հարվածում է նաև Ռուսաստանի արտաքին քաղաքականությանը»,-շեշտեց Գարիկ Քեռյանը:
Մանրամասները՝ տեսանյութում: