Հայաստանի Հանրապետության էկոնոմիկայի նախարար Տիգրան Խաչատրյանը և Զբոսաշրջության կոմիտեի նախագահ Սուսաննա Սաֆարյանը տեսազանգի միջոցով քննարկում են ունեցել զբոսաշրջության ոլորտի մասնավոր հատվածի ներկայացուցիչների հետ:
Քննարկման հիմանական թեմաներն էին զբոսաշրջության ոլորտին հասցված վնասը, ոլորտում առկա խնդիրները և աջակցության հնարավոր մեխանիզմերի վերհանումը՝ ամփոփելով նաև նախորդ հանդիպումների արդյունքները:
Նախարարը տնտեսվարողներին է ներկայացրել կառավարությունում հարցի շուրջ քննարկումների ընթացքը, ներկայումս սեղանին գտնվող աջակցության գործիքների մի քանի սցենար՝ համապատասխան չափանիշներով և մեխանիզմներով: Նախարարն առաջարկել է քննարկել, թե ներկայացվածներից որոնք են ավելի նպատակահարմար և թիրախային զբոսաշրջության ոլորտին հասցված վնասները մեղմելու տեսանկյունից:
Քննարկմանը մասնակցել են զբոսաշրջության որոշ ենթաոլորտների ներկայացուցիչներ, մասնավորապես՝ կացության ապահովում, զբոսաշրջային ընկերություններ և զբոսաշրջային ուղևորափոխադրումներ ենթաոլորտներից:
Քննարկման մասնակիցներից Տուրիզմի հայկական ֆեդերացիայի նախագահ Մեխակ Ապրեսյանը «Առաջին լրատվական»-ի հետ զրույցում տեղեկացրեց, թե մասնավորապես ինչ հարցեր են քննարկել նախարարի և Զբոսաշրջության կոմիտեի նախագահի հետ։
Ըստ այդմ՝ քննարկման առարկա է եղել երկու հիմնական հարց, որի մասին տուրիզմի ոլորտի ներկայացուցիչները և անձամբ Մեխակ Ապրեսյանը բազմիցս մեզ հետ զրույցներում բարձրաձայնել են։ «Այսօր կա երկու շատ կարևոր հարց։
Առաջինը՝ ոլորտում աշխատատեղերի պահպանման խնդիրն է, մյուսը՝ վարկային պարտավորությունները։ Այսօր ոլորտում հրամանական է աշխատատեղերի պահպանության հարցը։ Հիմա աշխատողին կորցնել, մեկ շաբաթ, ամիս հետո նորն ընդունել չի լինի։ Այս ոլորտի հիմնական կապիտալը մարդկային ռեսուրսն է, որակյալ կադրերը։ Եթե մենք դա կորցնենք, կկորցնենք մեր կարողությունները։ Վերականգնումը շատ երկար ժամանակ կարող է խլել։ Մենք քննարկել ենք պետության կողմից այդ հարցով աջակցության հնարավորության հարցը։ Այսինքն՝ հնարավորության դեպքում պետությունը սուբսիդավորի ամեն 3-րդ կամ 4-րդ աշխատողի աշխատավարձը»,- ասաց Ապրեսյանը։
Քննարկման ժամանակ ոլորտի ներկայացուցիչների կողմից նաև ներկայացվել են տնտեսվարողների վարկային պարտավորությունների հետ կապված հարցերը։ Մինչ կորոնավիրուսը ոլորտն ամենածաղկունն էր, բանկային համակարգի համար՝ տնտեսվարողները՝ ամենաերանելին ու վստահելին։ Կորոնավիրուսային համավարակի այս ընթացքում իրավիճակը փոխվել է, ոլորտի տնտեսվարողները դարձել են ռիսկային ոլորտի ներկայացուցիչներ՝ եկամուտներից զուրկ։ «Այս հարցը դամոկլյան սրի նման կախված է զբոսաշրջային ոլորտի գլխին։ Ոլորտի շատ տնտեսվարողներ, չունենալով եկամուտներ, ունեն գործող վարկային պարտավորություններ։ Ամենաիդեալականն այն կլինի, որ բանկերը ողջամիտ ժամկետով տրամադրեն իրական վարկային արձակուրդներ։ Ցավոք սրտի, հիմա դա տեղի չի ունենում։ Գուցե դա շատ ծանր նստի բանկերի վրա։ Այդ դեպքում մենք առաջարկում ենք, որ պետությունը միջամտի։ Իսկ միջամտությունը այսկերպ ենք պատկերացնում՝ պետությունը մինչև մյուս տարվա ապրիլ սուբսիդավորի գործող վարկերի տոկոսները, իսկ բանկերը չպահանջեն մայր գումարները։ Դա կստացվի վարկային արձակուրդ»,- ընդգծեց Մեխակ Ապրեսյանը։
Նրա խոսքերով՝ եթե վերը նշված տարբերակները բարդություն կարող են առաջացնել, իրենք ունեն ևս մեկ տարբերակ։
Այն է՝ պետության կողմից տրամադրվեն անտոկոս կամ շատ ցածր տոկոսադրույքով երկարաժամկետ փոխառու միջոցներ՝ առնվազն մեկ տարի արտոնյալ ժամկետով։ «Այս տարբերակներն էինք քննարկում։ Կարծես թե խնդրի ընդհանուր ընկալում կա։ Մենք մեծ հույս ունենք, որ այս հարցերը լուծում կստանան»,- շեշտեց մեր զրուցակիցը։
Հարցին՝ պետական կառույցների ներկայացուցիչների, այս դեպքում էկոնոմիկայի նախարարի և Զբոսաշրջության կոմիտեի նախագահի տրամադրվածությունն այս հարցի հետ կապված ինչպիսի՞ն է, իրենք ի՞նչ կարծիք ունեն, իրատեսական համարո՞ւմ են այս տարբերակները, Ապրեսյանը պատասխանեց՝ իրենք նկատեցին, որ խնդիրների լուծման ուղղությամբ կա ընդհանուր ընկալում։ «Հնարավոր է՝ հարցի քննարկումը շարունակվի երկուշաբթի օրը։ Մենք ամեն դեպքում մեր հույսը չենք կորցնում։
Նախարարը, կարծում եմ, կառավարությունում կքննարկի այս հարցերը։ Մեր հույսը հավատն ու վստահությունն է, որ կառավարությունում այս խնդրի շուրջ ընդհանուր մոտեցում կա, կամք կա։ Դա մեծ հույս է տալիս մեզ»,- իր խոսքն ամփոփեց Մեխակ Ապրեսյանը։
