Օրերս ԱԺ նախագահը ստորագրեց «Սահմանադրական դատարանի մասին օրենքում» փոփոխություններ և լրացումներ կատարելու մասին օրենքը: Թեմայի շուրջ «Առաջին լրատվական»-ի հետ զրույցում Սահմանադրական դատարանի դատավոր Վահե Գրիգորյանն անդրադառնալով հարցին, թե արդյոք սահմանադրական դատարանի շուրջ ստեղծված ճգնաժամն արդեն կարելի է համարել հանգուցալուծված, նշեց, որ հանգուցալուծման գործընթացը սկսվել է 2020թ. հունիսի 22-ին ընդունված փոփոխությունների ուժի մեջ մտնելուց ի վեր, այսինքն՝ հունիսի 26-ից:
Վահե Գրիգորյանի խոսքով՝ ԱԺ նախագահի կողմից Սահմանադրական դատարանի մասին սահմանադրական օրենքի փոփոխությունները ստորագրելուց հետո առանձնապես ոչ մի որակական փոփոխություն տեղի չի ունեցել: «Փոփոխություններն ուժի մեջ են մտել հունիսի 26-ին՝ Սահմանադրության 213-րդ հոդվածի ուժի մեջ մտնելու պահից սկսած, այսինքն՝ դադարեցվել են ՍԴ նախկին երեք անդամների լիազորությունները և ՍԴ նախագահի լիազորությունները. ՍԴ բոլոր այն ադամները, որոնք նշանակվել են մինչև 2015թ. փոփոխությունների ուժի մեջ մտնելը, շարունակելու են դատավորի կարգավիճակով իրենց պաշտոնավարումը մինչև 12-ամյա ժամկետի ավարտը»:
Վահե Գրիգորյանի գնահատմամբ՝ փոփոխությունների մասին այս օրենքը սահմանադրականության հետ խնդիր չունի: Հարցին, թե այս օրենքի փոփոխությունը վերեդարձնելո՞ւ է ՍԴ-ին իր լեգիտիմությունը, ՍԴ դատավորը պատասխանեց. «ՍԴ-ի դեմոկրատական խնդրի լուծման հիմնական միջոցը Սահմանադրության փոփոխությունն է և ոչ թե այս օրենքի փոփոխությունը»:
Դիտարկմանը, որ ընդդիմախոսներն իր վարքագծում տեսնում են քաղաքական գծեր, մեր զրուցակիցը նշեց. «Ես երբևէ կուսակցական չեմ եղել, քաղաքականության մասին իմ և ՍԴ նախկին անդամների պատկերացումները տարբեր են. իմ մոտեցումները իրավական են, ռացիոնալ և ուղղված են հանրային շահի բավարարմանը»:
Մանրամասն՝ տեսանյութում:
Մանրամասն՝ տեսանյութում: