Նախօրեին հայտնի է դարձել, որ ադրբեջանցու պատկանող հերթական մոսկովյան շուկայից հանել են հայկական ապրանքներն ու արգելել վաճառքը: Բացի այդ, համացանցում տեսանյութեր են տարածվում, թե ինչպես են ադրբեջանցիները կանգնեցնում հայկական համարանիշներով մեքենաները, դրանք ջարդուխուրդ անում, հարձակվում հայերի վրա և այդպիսով ծեծկռտուք հրահրում։
Մոսկվայում բնակվող հայազգի իրավապաշտպան, փորձագետ Արբակ Խաչատրյանն «Առաջին լրատվական»-ի հետ զրույցում, անդրադառնալով ստեղծված իրավիճակին, ասաց՝ եթե լուրջ գործողություններ չձեռնարկվեն, իրավիճակը կարող է վերահսկողությունից դուրս գալ. «Այնպես չէ, որ այս քաոսը կանխատեսելի չէր, բայց կանգնեցնելն էլ մեծ դժվարություն չի ներկայացնում։ Պարզ է, որ կան կազմակերպիչներ՝ թե՛ Ադրբեջանում և թե՛ Մոսկվայում, բոլորը թալանչի միլիարդատերեր են՝ նախագահ, նրա տիկինը, ընկերուհին, Մոսկվայի առևտրի կենտրոնի ղեկավարները։ Տեսա՞ք ԱՄՆ-ում ինչ կատարվեց մի սևամորթի սպանության հետևանքով, էմոցիաները մշտապես թելադրել են քաղաքական իրավիճակները, ու բացառված չէ, որ իրավիճակը վերահսկողությունից դուրս գա նաև ազգամիջյան այսպիսի խնդրի դեպքում»։
Մեր զրուցակիցն ընդգծեց. «Կյանքն ու պատմությունը ցույց են տվել, որ կրթված ազգերը, մշակույթ ունեցող ազգերը երբեք նման քայլերի չեն գնում, ցույց կազմակերպելը մի բան է, նման քաոս ստեղծելը՝ բոլորովին այլ։ Ես ինչո՞ւ եմ ասում, որ Հայաստանը պետք է աշխատի իր մշակույթի, քաղաքակրթության վրա։ Դա է մյուս պետություններից տարբերվելու միակ ճանապարհը»։
Արբակ Խաչատրյանի խոսքով՝ Մոսկվայում այսօր չպետք է ձերբակալվեն միայն նման խառնաշփոթ ստեղծող ադրբեջանցի հասարակ քաղաքացիները, այլ այն անձինք, ովքեր կազմակերպել են դա: «Նկատի ունեմ առևտրի կենտրոնների ղեկավարներին, որոնք ամեն տեղ հայտարարում են, որ Ռուսաստանի նախագահի ընկերն են։ Սա մի քանի ժամում բացահայտելու դեպք էր։ Միայն Պուտինի խոսքով մի քանի տարի առաջ վրացիների վրա հարձակում եղավ, նույնիսկ վրաց երեխաներին դպրոցներից հանում էին։ Եթե «բարձրյալի»՝ ՌԴ նախագահի մեջ ցանկություն լիներ, իրավիճակը սրան չէր հասնի կամ էլ շատ արագ կավարտվեր։ Եթե նա ասի՝ մի քանի ժամում հարցը կփակվի ու կհանդարտվի։ Մոսկվայում առանց նրա իմացության, թողտվության ոչինչ չի լինում։ Հիմա ես որ տեսնում եմ, թե դիմակների գործով ինչ լավ են աշխատում Հայաստանում, ակամայից ցանկանում եմ, որ ադրբեջանցիների դեմ այդպես աշխատեն Մոսկվայի իրավապահները։ Այդ դեպքում ամեն հարց արդեն կարգավորված կլիներ»,- եզրափակեց նա։
