Թերթը գրում է, որ Երևանի զարգացման 2011 թվականի ծրագրի համաձայն՝ այս տարի նախատեսվում էր սկսել Կարեն Դեմիրճյանի անվան Երևանի մետրոպոլիտենի «Երիտասարդական» կայարանի երկրորդ մուտքի (Աբովյան-Սայաթ-Նովա խաչմերուկում) շինարարությունը: Նշված տեղանքն այն վայրն է, որտեղ այս օրերին ինտենսիվ կերպով վեր են խոյանում Սբ Աննա եկեղեցին և Ամենայն Հայոց կաթողիկոսի երևանյան նստավայրի շենքը:
«Երկիր»-ի տեղեկություններով՝ փորձագիտական խումբը հսկայածավալ աշխատանքներ է կատարել մետրոպոլիտենի «Երիտասարդական» կայարանի երկրորդ մուտքի թունելի աշխատանքներ հետ կապված, կազմվել են նախագծահաշվարկային փաստաթղթերը.
«Իսկ երբ քաղաքային իշխանությունները մետրոյի կայարանի մուտքի համար նախատեսված տարածքը հանձնեցին մայր Աթոռին՝ կառուցապատման համար, փորձագիտական խումբն առաջարկեց, որ կայարանի մուտքն անցնի եկեղեցու տակով: Ինչևէ, այս օրերին կառուցվում է Սբ Աննա եկեղեցին, որի հաստ հիմքերի վրա արդեն մի քանի շաբաթից պատրաստ կլինի առաջին հարկը, իսկ «Երիտասարդական»-ի երկրորդ մուտքի կառուցման մասին խոսելն արդեն անիմաստ է:»,- գրում է թերթը և հավելում.
«Ի դեպ, դեռ 2009 թվականին Երևանի մետրոպոլիտենը Վերակառուցման և զարգացման եվրոպական բանկից ստացել է 15 մլն եվրո՝ ռազմավարական այդ կառույցի բարելավման համար, որում նախատեսված էին նաև «Երիտասարդական»-ի երկրորդ մուտքի կառուցման գումարները»: