Իրանը մտադիր է մեկ այլ պետության զինյալների կողմից իրանական ուղևորատար ինքնաթիռի հետապնդման միջադեպից հետո դիմել ՄԱԿ-ի գլխավոր քարտուղարին և կազմակերպության Անվտանգության խորհրդին (ԱԽ): Այս մասին հայտարարել է ՄԱԿ-ում Իրանի առաքելությունը՝ փոխանցում է ՌԻԱ Նովոստի-ն:
Կազմակերպությունում Իրանի մշտական ներկայացուցիչ Մաջիդ Թախտ-Ռավանչին արդեն իսկ արտակարգ զրույց է ունեցել ՄԱԿ-ի գլխավոր քարտուղար Անտոնիո Գուտերեշի հետ՝ ասվում է առաքելության տարածած հայտարարության մեջ: Նրանք հավելել են, որ իրանական կողմը մտադիր է պաշտոնական նամակներ ուղարկել Գուտերեշին և ՄԱԿ-ի Անվտանգության խորհրդին՝ խնդրելով, որ նրանք ձեռնարկեն գործողություններ:
Ավելի վաղ հաղորդվել էր, որ իրանական ուղևորատար ինքնաթիռը արտակարգ վայրէջք է կատարել կործանիչների մոտենալու պատճառով: Վիրավորվել են մի քանի ուղևորներ: Սկզբնապես ենթադրվում էր, որ կործանիչները պատկանել են Իսրայելին, սակայն ինքնաթիռի անձնակազմը հայտարարել է, որ կործանիչների օդաչուները ներկայացել են որպես ամերիկացիներ: