Ռուսաստանի նախագահ Վլադիմիր Պուտինը հեռախոսազրույց է վարել իր ամերիկացի գործընկեր Դոնալդ Թրամփի հետ:
Նրանք քննարկել են ռազմավարական կայունության և սպառազինության վերահսկման հիմնախնդիրները: Պուտինը և Թրամփը հաստատել են «այդ հարցերի շուրջ երկկողմ խորհրդակցությունների արդիականությունը», ներառյալ Ռազմավարական հարձակողական սպառազինության կրճատման վերաբերյալ պայմանագրի թեման:
Նաև երկու երկրների ղեկավարները շնորհավորանքներ են փոխանակել «Սոյուզ-Ապոլոն» համատեղ ծրագրի շրջանակում ուղեծրային թռիչքի 45-ամյակի կապակցությամբ:
Միևնույն ժամանակ, ըստ Կրեմլի մամլո ծառայության, նրանք նշել են միջազգային անվտանգության հարցերի լայն շրջանակի շուրջ ՄԱԿ-ի Անվտանգության խորհրդի մշտական անդամ-երկրների գագաթնաժողով անցկացնելու Մոսկվայի նախաձեռնության մեծ կարևորությունը:
Բացի այդ, նրանք քննարկել են իրանական միջուկային ծրագրի շուրջ ստեղծված իրավիճակը: Պուտինը և Թրամփը նշել են տարածաշրջանում կայունության և «միջուկային զենքի չտարածման գլոբալ ռեժիմի» պահպանման հավաքական ջանքերի կենտրոնացման անհրաժեշտությունը:
Կողմերը երկուստեք ցանկություն են հայտնել զարգացնել Ռուսաստանի և Միացյալ Նահանգների միջև առևտրատնտեսական համագործակցությունը: Նրանք բարձր են գնահատել համագործակցությունը կորոնավիրուսի տարածման դեմ պայքարում:
