Իսպանական ոստիկանությունը հետաքննում է, թե ինչպես են Հռոմեական կայսրության ժամանակների արտեֆակտները հայտնվել ծովափնյա քաղաքի սովորական մթերային խանութում: Այս մասին ասվում է Իսպանիայի քաղաքացիական գվարդիայի պաշտոնական հաղորդագրությունում:
Արտեֆակտները հայտնաբերվել են տեսուչների կողմից Իսպանիայի հարավարևելյան ափի Ալիկանտե քաղաքում սառեցված ծովամթերքի խանութի պլանային ստուգման ժամանակ: Նրանց ուշադրությունը գրավել է խանութում որպես դեկոր օգտագործված ամֆորները, որոնք շատ հին տեսք ունեին՝ ընդամենը 13 անոթ:
Պարզվել է, որ ամֆորները թվագրվում են մ.թ.ա. I դար և պատմական մեծ արժեք ունեն, իսկ դրանցից մեկը՝ հազվագյուտ է: Հին ժամանակներում դրանք օգտագործվել են ձիթապտղի յուղ, գինի և ձկան սոուսներ պահելու համար:
Բացի ամֆորներից, խանութում հայտնաբերվել են նաև ավելի ուշ ժամանակների մի քանի արտեֆակտներ. 18-րդ դարի նավի խարիսխ և կրաքարե հին ցուցանակ՝ «ESTE» մակագրությամբ, որը իսպաներեն նշանակում է «Արևելք»:
Խանութի սեփականատերը պնդում է, որ այս բոլոր իրերը որդին գտել է ձկնորսության ժամանակ:
Արտեֆակտներն այժմ տեղափոխվել են Սանտա-Պոլայի Ծովի թանգարան՝ դրանց տարիքը և ծագումը պարզելու նպատակով:
Խանութի սեփականատիրոջ և նրա որդու հետ կապված հետաքննություն է սկսվել:
«Ամֆորները կարող էին վերցվել խորտակված նավերի մնացորդներից, իսկ դրանք պաշտպանված են որպես ստորջրյա հնագիտական հուշարձաններ»,- ասվում է ոստիկանության հաղորդագրության մեջ:
Այս հիմքով հորը և որդուն կարող են մեղադրանք առաջադրել պատմական ժառանգության դեմ ուղղված հանցագործության, ինչպես նաև կասկածելի կամ ապօրինի ծագման օբյեկտների ձեռքբերման և տիրապետման համար: