«Տավուշի սահմանային դեպքերից հետևություններ ենք արել մեր բանակի գործողությունների մասին, ավելի մեծ հետևություններ արել ենք Թուրքիայի դերի վերաբերյալ, ինչպես նաև դիտարկել ենք ընդհանուր համաշխարհային արձագանքը և մոտեցումներն այս հակամարտության վերաբերյալ: Միջազգային գրեթե բոլոր կառույցները արձագանքել են, դա վկայում է այն մասին, թե որքանով են լուրջ վերաբերվում այս հակամարտությանը և ինչ հնարավոր զարգացումներ են կանխատեսում»,- «Առաջին լրատվական»-ի հետ զրույցում այս մասին ասաց Պաշտպանության նախկին նախարար Վաղարշակ Հարությունյանը:
Վաղարշակ Հարությունյանի կարծիքով՝ Տավուշի սահմանային դեպքերը պետք է վերլուծել քաղաքական, ռազմական և զուտ բանակի ներքին կազմակերպչական հարցերի տեսանկյունից: «Ինչու է հակառակորդը դա իրականացրել. հնարավոր է, որ նրանց զինվորները մոտեցել են մեր դիրքերին, մեր զինվորները նրանց հնարավորություն են տվել հետ գնալ, նրանք ՈւԱԶ-ը բալանսից հանելու համար կրակ են բացել և գնացել են ներկայացրել, թե Հայաստանն է կրակ բացել… Նման միջադեպերը կարող են բերել լայնածավալ գործողությունների: Հայկական կողմը միշտ առաջարկում է սահմանին կիրառել մեխանիզմներ, ադրբեջանական կողմը հրաժարվում է, քանի որ իրենք են սկսում…»:
Թուրքիան ի՞նչ դերակատարություն է ունեցել այս լարվածության առումով: Վաղարշակ Հարությունյանի դիտարկմամբ՝ որպեսզի հասկանալի լինի, թե Թուրքիան ինչ դերակատարում է ունեցել, պետք է գլոբալ նայել այս հարցին՝ ընդհանրապես Թուրքիան ինչ խնդիր է լուծում այս տարածաշրջանում: «Թուրքիան իրականացնում է իր նեոօսմանիզմի գաղափարախոսությունը՝ հզոր Թուրքիայի կայսրությունը վերականգնելու համար:
Ադրբեջան-Թուրքիա հարաբերություններում ի սկզբանե Թուրքիան ամեն ինչ արել է, որ «երկու պետություն-մեկ ազգը» դառնա «մեկ պետություն -մեկ ազգ»: Ալիևը թաքնվում է Թուրքիայի մեջքի հետևում, իսկ Թուրքիան ուզում է ամբողջովին կուլ տալ Ադրբեջանին: Անկարան Ալիևին օգտագործեց, նա հիմա ամբողջությամբ Թուրքիայի տրամադրության տակ է և կատարում է նրա ասածները: Արցախ-Ադրբեջան պայքարի ձևաչափը փոխվել է, հիմա Հայաստան-Թուրքիա պայքար է»:
Մանրամասն՝ տեսանյութում: