Կորոնավիրուսի համավարակը, թերևս, ամենամեծ հարվածը հասցրել է մշակույթի ոլորտին: «Երգչախմբերը, նվագախմբերը շատ վատ վիճակում են, պարալիզացված նստել ենք տանը»,- «Առաջին լրատվական»-ի հետ զրույցում այս մասին ասաց «Հայաստանի փոքրիկ երգիչներ» երգչախմբի գեղարվեստական ղեկավար և գլխավոր դիրիժոր Տիգրան Հեքեքյանը՝ հավելելով, որ որոշվել է մրցույթներն անցկացնել առցանց տարբերակով: «Հայաստանի փոքրիկ երգիչներ» երգչախումբն արժանացել է հատուկ մրցանակի՝ Համաշխարհային երգչախմբային խաղերի կողմից անցկացված առցանց մրցույթում:
«Շատ կարևոր է կրթությունը. կարևոր է, թե ինչպես կկրթենք վաղվա նախարարին, վաղվա վարչապետին, վաղվա գեներալին, չէ որ կրթելով երեխաներին՝ մենք չգիտենք՝ ինչ կդառնան հետո, բայց եթե այսօր թերի կրթություն տանք, վաղը հատուցելու ենք դրա համար: Իմ կարծիքով՝ կրթությունը պետության հիմքն է: Եթե կրթությունը կաղում է, ներքևում մի քիչ ճոճվում է, ապա վերևում ամպլիտուդը շատ մեծ կլինի անգամ փոքրիկ ցնցման դեպքում»,- նշեց դիրիժորը:
Կորոնավիրուսի համավարակով պայմանավորված՝ մեր հանրապետությունն անցավ հեռավար կրթության, և տարբեր մասնագետների՝ հոգեբանների, մանկավարժների կարծիքով՝ դա կարող է բացասաբար անդրադառնալ երեխաների հոգեբանության վրա: Անդրադառնալով այս դիտարկմանը՝ Տիգրան Հեքեքյանն ընդգծեց, որ սա կրթական աղետ է, եթե դպրոցները չբացվեն, մի ամբողջ սերունդ կկորցնենք:
Մանրամասն՝ տեսանյութում: