Բուլղարիայի վարչապետ Բոյկո Բորիսովը հայտարարել է, որ հրաժարական են ներկայացրել ֆինանսների, էկոնոմիկայի, ներքին գործերի եւ տուրիզմի նախարարները: Այս մասին հաղորդում է BGNES-ը:
«Մենք ընդունել ենք Վլադիսլավ Գորանովի, Մլադեն Մարինովի, Էմիլ Կարանիկոլովի և նաև Նիկոլինա Անգելկովայի հրաժարականը»,- ասել է Բորիսովը:
Ֆինանսների, էկոնոմիկայի և ներքին գործերի նախարարների սպասվող հրաժարականի մասին հայտնի էր դարձել անցյալ շաբաթ: Բորիսովը երեք նախարարներին խնդրել է հեռանալ`վերջ տալու համար այն շահարկումներին, որ նրանք դավադրության մեջ են ընդդիմադիր էթնիկ թուրքական DPS (Շարժում հանուն իրավունքների և ազատությունների) կուսակցության և նրա ավագ անդամ, գործարար և մեդիամագնատ Դելյան Պեևսկու հետ:
Զբոսաշրջության նախարար Նիկոլինա Անգելկովան հրաժարական է տվել կորոնավիրուսային ճգնաժամի հետևանքով զբոսաշրջության ոլորտում առաջացած լճացման պատճառով:
Հրաժարականները տեղի են ունենում Սոֆիայում և ամբողջ երկրում շարունակվող հակակառավարական բողոքի ցույցերի արդյունքում: Ցուցարարները պահանջում են ամբողջ կառավարության, գլխավոր դատախազ Իվան Գեշեվայի հրաժարականը և արդար ընտրությունների անցկացում:
Բողոքի ցույցերը շարունակվում են արդեն երկու շաբաթ: