Թուրքիայի մեջլիսի հայ պատգամավոր, քրդամետ «Ժողովուրդների դեմոկրատական» կուսակցության (ԺԴԿ-HDP) փոխնախագահ Կարո Փայլանը այդ երկրի արտգործնախարար Մևլյութ Չավուշօղլուին ուղղված հարցադիմում է ներկայացրել խորհրդարան։
Փայլանը հարցադիմումի մեջ նշելով հայ-ադրբեջանական լարվածության օրերին Ադրբեջանին բոլոր հնարավորություններով աջակցելու պատրաստակամության մասին Թուրքիայից հնչած հայտարարությունները, հիշեցրել է, որ Թուրքիան Մինսկի խմբի անդամ է և չեզոքություն պահպանելու փոխարեն նման հայտարարություններով ավելի է մեծացնում լարվածությունը:
Նա հետևյալ հարցերն է հղել Թուրքիայի ԱԳՆ ղեկավարին.
- Հայաստանի ու Ադրբեջանի միջև ծագած հակամարտության մեջ ցեղայի՞ն պատճառներով է, որ կողմնակալություն եք ցուցաբերում։
- Դեռևս չե՞ք հասկացել, որ ռասիստական արտաքին քաղաքականությունը «կրակի վրա յուղ լցնել» է նշանակում և միայն մեծացնում է հարցերը:
- Թուրքիայի ռազմական արդյունաբերությունը ցանկանում է ավելի շատ զենք վաճառել Ադրբեջանին։ Լարվածությունն այս պատճառո՞վ է, որ սաստկացնում եք։
- Մտածո՞ւմ եք Ադրբեջան զորք ուղարկելու ուղղությամբ:
- Թուրքիան, եթե ցեղային պետություն չէ, ինչո՞ւ է արտաքին քաղաքականությունը վարում ցեղապաշտական նկրտումներով։
- Երբեմն հիշո՞ւմ եք արդյոք, որ ԵԱՀԿ Մինսկի խմբի անդամ եք, որը հիմնադրվել է Հայաստան-Ադրբեջան լարվածությունը նվազեցնելու նպատակով։
- Դեռ չե՞ք հասկացել, որ Կովկասի ապակայունացումը ձեռնտու է միայն Ռուսաստանին։
Ինչպե՞ս կմեկնաբանեք Ադրբեջանի Պաշտպանության նախարարության այն սպառնալիքը, ըստ որի՝ նրանք պատրաստ են հարվածելու Թուրքիա-Հայաստան սահմանին գտնվող ատոմակայանին: