Տավուշի իրադարձությունները ևս մեկ անգամ վերահաստատեցին, որ հայկական զինված ուժերը ռեգիոնալ անվտանգության համակարգի առանցքն են և լիովին ի վիճակի են պահպանել այդ դերը, որի խորքային նշանակություններից մեկն էլ այն է, որ անվտանգություն սպառողից հայկական պետականությունը արցախյան հաղթանակով վերածվել է անվտանգություն ստեղծողի: Եվ այդ հաղթանակի խորքային, քաղաքակրթական իմաստն ու բովանդակությունը եղել է այնքան ուժեղ, որ անգամ հայկական պետականության հետագա կառավարման մոտ երկու տասնամյակի անորակ, մսխման, յուրացման տրամաբանությամբ գործող համակարգի քառորդ դարն անգամ կասկածի տակ չի դրել Հայաստանի դերն ու նշանակությունը: Միևնույն ժամանակ, այդ դերն ու նշանակությունը, անշուշտ, չեն կարող կառուցված լինել լոկ զինված ուժերի մարտունակության ու ռազմա-տեխնիկական հագեցածության տրամաբանության վրա:
Բանն այն է, որ անվտանգությունն իր ժամանակակից բաղադրությամբ, բաղկացուցիչներով, գրեթե անսահման ընդգրկման երևույթ է, չունի սկիզբ և վերջ, ըստ այդմ՝ ներառում է կենսագործունեության բոլոր ոլորտները: Իսկ դա նշանակում է, որ մենք անվտանգություն ստեղծող պետք է լինենք բոլոր ոլորտներում, ոչ միայն ռազմական անվտանգային միջավայրում: Անվտանգությունը տվյալ պարագայում արդիականության, մրցունակության, մրցակցայնության, գրավչության, նորարարության հոմանիշն է: Հակառակ դեպքում՝ Հայաստանի ռեգիոնալ անվտանգության երաշխավորի կամ առանցքի դերը միշտ լինելու է կիսատ, չի ամբողջականանալու, ինչն էլ իր հերթին պարբերաբար կարող է հարուցել իրավիճակներ, երբ կձևավորվի Հայաստանի հանդեպ որևէ կասկած, որը կարող է դառնալ Հայաստանի համար անվտանգության լայն սպառնալիքի աղբյուր: Հայաստանի դերի ամբողջացումը, ըստ այդմ՝ դրա գործնականում՝ անգամ ոչ բարեկամ երկրների համար անսակարկելիությունը պահանջում է Հայաստանի քաղաքացիական և ռազմական կենսագործունեության բարձր և միաժամանակ խոր մակարդակի ներդաշնակեցում, երբ Հայաստանը կարտադրի ոչ միայն անվտանգություն՝ այդ բառի բոլոր իմաստներով ու ընդգրկումներով, այլ նաև կարտադրի այդ անվտանգության արժեհամակարգային ու գաղափարական հիմքը, կամ, այլ կերպ ասած՝ անվտանգություն կարտադրի այսպես ասած՝ վերամշակված ամբողջական ցիկլով, էապես բարձրացնելով դրա թե՛ միջազգային արժեքը, թե՛ Հայաստանի համար դրա էֆեկտիվությունը:
