Բրազիլիայի նախագահ Ժայիր Բոլսոնարուի կորոնավիրուսի երրորդ թեստը դրական արդյունք է արձանագրել: Այդ մասին հաղորդել է G1 պորտալը՝ վկայակոչելով պետության ղեկավարի վարչակազմի հաղորդագրությունը:
«Նախագահ Ժայիր Բոլսոնարուի առողջական վիճակն առաջվա պես լավ է, նրան հսկում են բժիշները… Թեստը, որն արվել է նախօրյակին՝ հուլիսի 21-ին, դրական արդյունք է արձանագրել»,-պորտալը մեջբերում է վարչակազմի հաղորդագրությունը:
Առաջին անգամ Բրազիլիայի ղեկավարի մոտ հիվանդությունը հայտնաբերել են հուլիսի 7-ին, ինչից հետո նա մեկուսացման մեջ է գտնվում իր պաշտոնական նստավայրում:
Բոլսոնարուն մի քանի անգամ լուսանկար է զետեղել սոցցանցերում, որտեղ նա նախաճաշում է, սուրճ խմում և կերակրում է ջայլամներին, որոնք ապրում են նստավայրում, ցուցադրում է իր լավ ինքնազգացողությունը: Հուլիսի 19-ին նա իր մի քանի հարյուր կողմնակիցների է ընդունել պալատի այգիներում: Տեսանյութում, որը տարածվել է Efe գործակալության կողմից, երևում է, որ նախագահին և հավաքվածներին բաժանել է միայն նեղ, ոչ խորը հայելանման արհեստական լճակը:
Ինչ-որ մի պահի հավաքվածներին դիմելու ժամանակ Բոլսոնարուն նույնիսկ հանել է դիմակը:
Նախագահը, որը 65 տարեկան է, ակտիվորեն քննադատում է դրույթները, որոնք Բրազիլիայի նահանգներում առևտուրն ու ծառայությունները սահմանափակում են COVID-19 կորոնավիրուսային վարակի տարածման դեմ պայքարի համար, և հանդես է գալիս «ուղղահայաց մեկուսացման» անհրաժեշտության օգտին, որի դեպքում պետք է տանը մնան միայն ռիսկի խմբում գտնվող և 60-ից բարձր տարիքի քաղաքացիները:
Մարտ ամսին Բոլսոնարուն հայտարարել էր, որ ոչ մի կորոնավիրուս չի կարողանա իրեն կոտրել, և ԱՀԿ-ի կողմից հայտարարված համավարակի ֆոնին հիվանդությունը համարել է «ոչ մեծ գրիպ»:
