Արդեն երկու օր է՝ բուհեր չընդունված դիմորդներն ու նրանց ծնողները բողոքի ակցիա են իրականացնում։ Պատճառը ընդունելության նոր կարգն է, որով նախապատվությունը տրվում է առաջին հայտին։ Արդյունքում՝ բարձր բալեր հավաքած, բայց առաջին հայտով այլ մասնագիտություններ նշած շատ դիմորդներ դուրս են մնացել։
Այս խնդիրները մեկ քննություն հանձնելու պատճառո՞վ առաջացան․ «Առաջին լրատվական»-ի հարցին Ամերիկյան համալսարանի դասախոս Զոհրաբ Գևորգյանը պատասխանեց․ «Ես չեմ կարծում, որ այստեղ խնդիրը մեկ քննությունն է։ Այսինքն՝ խնդիրը ոչ թե քանակական է՝ մեկ, երկու կամ երեք, այլ խնդիրն այստեղ որակական է։ Ի՞նչ ենք ուզում քննության հիմքում դնել։ Եթե քննության հիմքում դնում ենք գիտելիքը, հետևաբար՝ հարց է առաջանում՝ ի՞նչն ենք անվանում գիտելիք։ Այն, որ հիմա Ազգային ժողովում կատարվում է, դա հետևանքն է։ Այսինքն՝ մենք այսօր տեսնում ենք անցած տարիների հետևանքը, որը փորձում ենք դիտարկել կարճաժամկետ առումով, որովհետև առաջ են գալիս մեղավորներ։ Այսինքն՝ երբ այս փակ շրջանում ելքերը բերում են մեղավորներ փնտրելուն ու գտնելուն, սա հենց խոսում է իրականության մեջ կրթական որակի մասին։ Խնդիր լուծելու մշակույթը չպետք է տանի մեղավորների փնտրտուքին»։
Իսկ «Ռեստարտ» նախաձեռնության անդամ Տիգրան Ազիզյանն էլ ասաց․ «Ես համաձայն եմ, որ այստեղ խնդիրն ավելի խորքային է, այսինքն՝ սա միանգամից առաջացած հարց չի։ Սա ընդամենը կրթական ոլորտում այս ընթացքում տեղի ունեցած բազմաթիվ գործընթացների հետևանքն է։ Օրենսդիրի ու գործադիրի միջև կոմունիկացիան, կարծում եմ՝ որոշակիորեն խզված է։ Այնինչ, կարող էր լինել սերտ համագործակցություն, որի արդյունքում այս հարցը կարող է լուծվել։ Իսկ այս հարցի համատեքստում կուզեի նշել, որ ինչքան էլ այն լինի հետևանք, ամեն դեպքում այս պահին ծառացած է լիազոր մարմնի առջև։ Այստեղ մարդկանց իրավունքներ են բախվում»։
Մանրամասները՝ տեսանյութում։