Ռամզան Կադիրովի և նրա ընտանիքի անդամների ԱՄՆ պատժամիջոցների ցանկում ներառումից հետո, Չեչնիայի մահմեդականների հոգևոր ղեկավարությունը պետդեպարտամենտին մեղադրել է «ահաբեկչական կազմակերպություններին աջակցելու» մեջ: Համապատասխան հայտարարությունը հրապարակվել է մուֆթիատի Instagram-ի պաշտոնական էջում:
«Չեչենական հանրապետության հոգևորականության ներկայացուցիչները շեշտում են, որ հստակ գիտեն, թե ինչպես են այդ բոլոր կեղծ դեմոկրատներն աջակցել ահաբեկիչներին, որոնք վայրագություններ էին անում չեչենական հողում»,- ասվում է մուֆթիի ուղերձում:
Չեչնիայի մուֆթիատը կարծում է, որ «այդ պատժամիջոցները մտցվել են իսլամի և ընդհանրապես չեչեն ժողովրդի դեմ»: Նրանց կարծիքով, Կադիրովը և նրա հայրը «պաշտպանել են չեչեն ժողովրդի ոտնահարված իրավունքները, վերականգնել Չեչենական Հանրապետության տարածքում մարդու սահմանադրական իրավունքների պահպանումը», ինչպես նաև Չեչնիան դուրս են բերել ռազմաքաղաքական ճգնաժամից:
Նախօրեին ԱՄՆ պետդեպարտամենտը Կադիրովի դեմ նոր պատժամիջոցներ է սահմանել խոշտանգումների, արտադատական մահապատիժների և մարդու իրավունքների այլ խախտումների համար: Պատժամիջոցները տարածվում են նաև Չեչնիայի ղեկավարի կնոջ՝ Մեդնի Կադիրովայի և նրանց դուստրերի՝ Այշաթի և Կարինայի (Խադիջատ) վրա:
Կադիրովն, իր հերթին, հայտարարել է, որ իր կինը և դուստրերը պատրաստ կլինեին հրաժարվել իրենց հետաքրքրություններից Միացյալ Նահանգներում և Եվրոպայում, եթե այդպիսիք լինեին:
