Տավուշի սահմանային բախումներին հետևել է նաև Հայաստանի ՄԻՊ գրասենյակը: «Առաջին լրատվական»-ի հետ զրույցում ՀՀ մարդու իրավունքների պաշտպան Արման Թաթոյանը նշեց, որ առաջին օրից՝ հուլիսի 12-ից սկսած՝ ՄԻՊ գրասենյակը հետևել է իրադարձություններին, ստացել է ահազանգեր բնակիչներից. «Սահմանել էինք շուրջօրյա դիտարկում… Երբ հրետակոծություններն արդեն գյուղերի ու բնակավայրերի ուղղությամբ էին, իրադարձությունները ցույց տվեցին, որ թիրախավորվել է քաղաքացիական բնակչությունը: Մենք մեր աշխատակզմի համապատասխան պատվիրակությամբ մեկնեցինք Տավուշի մարզի այն բնակավայրերը, որոնք գնդակոծության ներքո էին եղել՝ մասնավորապես Բերդ, Չինարի, Ներքին Կարմիրաղբյուր, Այգեպար և այլն, և այնտեղ մեր աշխատանքներն արդեն ակնհայտ ցույց տվեցին այն պատկերը, որ այդ հրետակոծությունները եղել են թիրախային: Ողջ ընթացքը կոպիտ խախտումների մասին է վկայում:
Մեզ համար շատ կարևոր է ցույց տալ Տավուշի հրետակոծության ժամանակ Ադրբեջանի մտադրությունների նենգությունը: Բոլոր հրետակոծություններից առաջ ԱԹՍ է ուղարկվել և հրետակոծությունը եղել է թիրախային, կոնյակի գործարանի ուղղությամբ, դիմակ արտադրող արտադրամասի ուղղությամբ և այլն: Միջազգային իրավունքի համաձայն՝ պետք է տարանջատել ռազմական օբյեկտները քաղաքացիական բնակավայրերից: Նրանց թիրախային հրետակոծությունները կրկնակի խախտման մասին են վկայում»:
Արման Թաթոյանը նաև հավելեց, որ այս անգամ ևս, ինչպես Ապրիլյան պատերազմի ժամանակ, Ադրբեջանը պաշտպանվում էր քաղաքացիական բնակչությամբ:
ՄԻՊ-ի խոսքով՝ միջազգային հանրությանը պետք է ճշգրիտ տեղեկություններ տալ. «Չպետք է թույլ տանք, որ ապատեղեկատվություն տարածվի»:
ՀՀ Մարդու իրավունքների պաշտպանը անդրադարձավ նաև Մեծամորի ատոմակայանը հրթիռակոծելու սպառնալիքների մասին Ադրբեջանի հայտարարություններին: Նրա ոսքով՝ այս հայտարարությունը Հայաստանի Հանրապետության ողջ բնակչությանն ուղղված ակնհայտ հանցավոր սպառնալիք է: «Նման հայտարարությունը պատերազմական հանցագործության բացահայտ մտադրություն է: Այն կարող է բերել հումանիտար աղետի ոչ միայն Հայաստանի, այլ նաև ողջ տարածաշրջանի համար: Ադրբեջանի այս հայտարարության մեջ անգամ ցեղասպանության հատկանիշներ կան, որովհետև կոնկրետ էթնիկ ծագմամբ պայմանավորված՝ ուղղված է մի ողջ ժողովրդի դեմ: Այս սպառնալիքը քաղաքացիական բնակչությանն ուղղված բացահայտ ահաբեկում է, ինչը միջազգային մարդասիրական իրավունքի բարցարձակ արգելք է»,- նշեց Արման Թաթոյանը՝ ընդգծելով նաև, որ այսպիսի հայտարարությունն անհետևանք չպետք է թողնել: