Աֆղանցի աղջիկն ինքնաձիգից գնդակահարել է «Թալիբան» արմատական շարժման երկու զինյալների և վիրավորել ևս մի քանիսին այն բանից հետո, երբ նրանք սպանել են իր ծնողներին: Այդ մասին հայտնել է տեղի ոստիկանության պետը «Ֆրանսպրես» գործակալությանը տված հարցազրույցում:
Միջադեպը տեղի է ունեցել Աֆղանստանի Գորի նահանգի գյուղերից մեկում: Թալիբները ներխուժել են մոտավորապես 14 տարեկան աղջկա՝ Քամար Գյուլի տուն, նրա հորը փնտրելով այն բանի համար, որ վերջինս աջակցություն է ցուցաբերել երկրի պաշտոնական կառավարությանը: Թալիբներն ընտանիքի հորը դուրս են բերում տնից և նրան սպանում:
Աղջկա մայրը, փորձելով պաշտպանել ամուսնուն, նույնպես սպանվում Է զինյալների կողմից: «Քամար Գյուլը, որը գտնվում էր տանը, վերցնում է AK-47 ինքնաձիգը, որը պատկանում էր իր ընտանիքին, և սկզբում գնդակահարում է «Թալիբան»-ի երկու զինյալներին, որոնք սպանել էին իր ծնողներին, իսկ այնուհետև վիրավորում մի քանիսին»,-հայտարարել է տեղի ոստիկանության պետ Հաբիբուռահման Մալեքզադեն: Նահանգապետի ներկայացուցիչը հայտնել է, որ ներկա դրությամբ աֆղանցի զինվորականները Գյուլին և նրա կրտսեր եղբորը տեղափոխել են «ավելի անվտանգ վայր»:
Աֆղանստանում դիմակայություն է կառավարական ուժերի և «Թալիբան» արմատական շարժման զինյալների միջև, որն ավելի վաղ զգալի տարածքներ էր զավթել երկրի գյուղական շրջաններում և հարձակում ծավալել խոշոր քաղաքների վրա: Նաև երկրի տարածքում ուժեղացել է «Իսլամական պետություն» ահաբեկչական խմբավորման ազդեցությունը: Աֆղանստանի պաշտպանության և անվտանգության ազգային ուժերն ամբողջ երկրում համատեղ գործողություններ են անցկացնում ահաբեկչության դեմ պայքարի ուղղությամբ, հաղորդել էՌԻԱ Նովոստին: