Ռուսաստանյան շուկայում հայկական ծիրանի հետ կապված խնդիրը լուծվո՞ւմ է, թե՞ արդեն լուծվել է․ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Հայկ Գևորգյանը պատասխանեց․ «Ուսումնասիրում են ամբողջ ինֆորմացիոն հոսքը։ Ավելի լավ գովազդ հայկական ծիրանի գովազդի համար դժվար էր մտածել, և ադրբեջանցիների այս արածը ճիշտ հակառակ էֆեկտը թողեց։ Կարծում եմ, որ այդ գովազդը հետագայում ավելի մեծ ազդեցություն կարող է թողնել»։
Ի՞նչ եք կարծում՝ այս ամենը Բաքվի քաղաքականության շարունակությո՞ւնն էր․ «Առաջին լրատվական»-ի հարցին Հայկ Գևորգյանը պատասխանեց․ «Գիտեք ինչ, դա ամեն դեպքում էժան քայլ էր։ Չգիտեմ, եթե մարդն առաջնորդվում է իր բիզնեսով, ապա նման քայլի չպետք է գնա, որովհետև դա պտտվելու է իր դեմ։ Այսինքն՝ դա շատ էժան ու անհեռատես քայլ էր, և կարծում եմ, որ դա կարող է հակառակ էֆեկտն ունենալ։ Իսկ մեր գործարարներն էլ հետագայում ապրանք արտահանելիս պետք է նկատի ունենան նաև նման դեպքերը, և իրենց աշխատանքը պետք է կազմակերպեն այնպես, որ հետագայում նման խնդիր ծագելու ժամանակ իրենց վնասները լինեն նվազագույն կամ ընդհանրապես չլինեն»։
Համաձա՞յն եք, որ այս վերջին դեպքերը չպետք է անհետևանք մնան, և ի՞նչ պետք է անել այս ընթացքում․ «Առաջին լրատվական»-ի հարցին պատգամավորը պատասխանեց․ «Կարծում եմ՝ հետագայում պետք է ցանցային մոտեցում դրսևորել և պայմանագրեր կնքել խոշոր ցանցերի հետ։ Չնայած՝ չեմ կարծում, որ դա հետագայում կկրկնվի, որովհետև քաղաքականությունը երբ մտնում է բիզնես, ապա այն նման դեպքերում պարտվում է»։
