Բարձրագույն ուսումնական հաստատություններ չընդունված ուսանողները և նրանց ծնողներն այս պահին բողոքի ակցիա են իրականացնում Գնահատման և թեստավորման կենտրոնի դիմաց։
«Որդիս առաջին հայտով դիմել էր իրավաբանական, հետո հայտում եղած ընդհանուր ութ տեղ էր նշել։ Ստացել է 15.75։ Բնականաբար առաջին հերթին տղաս ցանկացել է իրավաբանական ընդունվել։ Կան դիմորդներ, որ իմ տղայից բարձր են ստացել՝ 18.75, որոնք ընդամենը չորս հայտ լրացնելու պարագայում դուրս են մնացել և այս պահին ընդունված ուսանող չեն համարվում։ Դա ես համարում եմ սխալ ռազմավարություն ԿԳՄՍ նախարարության կողմից, որովհետև այդ նախարարությունն առաջին հերթին պետք է մտածի հայ երիտասարդի կիրթ լինելու համար, որպեսզի կրթությունը Հայաստանում ավելի բարձր մակարդակի վրա լինի։ Թող նախարարը կառավարության նիստում հարց բարձրացնի, որ լավագույն դիմորդների համար, որոնք բարձր գնահատականներ են ստացել, տեղեր ավելացնեն։ Դրանից պետությունը շահում է, քանի որ վճարովի է։ Առաջին կիսամյակից հետո լուրջ քննություն թող անցկացնեն, ովքեր վատ կտիրապետեն տվյալ մասնագիտական առարկաներին, որոնցից քննություն են հանձնելու, թող դուրս մնան։ Տեղեր ավելացնելով այս հարցին լուծում կտան»,-նշեց բողոքող ծնողներից մեկը։