Կառավարությունը հուլիսի 16-ի նիստում հաստատեց կապիտալի շուկայի զարգացման ծրագիրը, որի նպատակն է ներդնել կապիտալի շուկայի այնպիսի գործիքներ, որոնք կապահովեն երկրում ձևավորված խնայողությունների ներդրումը տնտեսության իրական հատվածում, թույլ կտան բնակչությանը մասնակցել երկրում իրականացվող ներդրումային ծրագրերին և ստանալ դրանցից եկամուտներ, որի շնորհիվ կապահովեն նաև տնտեսության ֆինանսավորման նոր գործիքների զարգացումը: Էկոնոմիկայի նախարար Տիգրան Խաչատրյանը տեղեկացրեց, որ ծրագրով առաջարկվող նախագիծը բաղկացած է 2 մասից՝ ՀՀ-ում կապիտալի շուկայի դիագնոստիկ վերլուծությունից և դրանց վրա կառուցված գործողությունների ծրագրից:
Հայաստանի կապիտալի շուկայում այսօր տիրող վիճակի և այս ծրագրի հեռանկարների մասին «Առաջին լրատվական»-ը զրուցեց ՆԱՍԴԱՔ ՕԷՄԷՔՍ Արմենիա ֆոնդային բորսայի նախկին գլխավոր տնօրեն, կապիտալի շուկայի մասնագետ Արմեն Մելիքյանի հետ:
«Այս շուկայի զարգացման համար էկոնոմիկայի նախարարի հայտարարած այդ դիագնոստիկան մենք ունեցել ենք թե՛ 1997թ-ին, թե՛ 2000 թ-ին, թե՛ 2007թ-ին և հիմա էլ դա շարունակվում է իրականացվել: Այս շուկայի հետ կապված բոլոր ծրագրերը, բոլոր խորհրդատվությունները մենք ունեցել ենք և դրանց շնորհիվ ստեղծվել է այն լավագույն ենթակառուցվածքը, որը մենք հիմա ունենք: Խնդիրն այն է, որ պարզապես այս շուկայի մասնակիցներ մենք չունենք: Ինչ վերաբերում է շուկայի գործիքներին, ապա պետք է խթանել, որպեսզի գործարարը ինքը գա կապիտալի շուկա և ներգրավի միջոցներ: Բացի այդ՝ քաղաքացիները նույնպես ունեն խնայողություններ, որպեսզի ներդրումներ անեն, իրենց խնայողությունները տարբեր ձևերով դիվերսիֆիկացնեն, սակայն դրա համար չկան գործիքներ՝ բացի պարտքային արժեթղթերից և բանկային դեպոզիտներից: Հիմա այս պարագայում հարց է ծագում՝ ո՞վ պետք է խթանի թողարկողին կամ գործարարին, որպեսզի նա թողարկի որևէ այլ բաժնետոմս: Որպեսզի խթանենք այս շուկան, նախևառաջ, անհրաժեշտ է ստեղծել արժեթղթերի շուկայի մասնակիցների բազա, որը կկարողանա պրոֆեսիոնալ ձևով սպասարկել գործարարներին, թողարկողներին ֆինանսական միջոցների ներդրման հարցում»,-մեզ հետ զրույցում ընդգծեց Արմեն Մելիքյանը:
Մանրամասները՝ տեսանյութում:
