Նյու Յորքի բնակչության մոտ 20% -ը կորոնավիրուսի իմունիտետ ունի, հայտարարել է Նյու Յորքի առողջապահության դեպարտամենտի հանրային տեղեկատվության հարցերով տնօրեն Ջոն Բրունոն:
Ըստ նրա, վերջերս նահանգի առողջապահության դեպարտամենտը հետազոտություն է անցկացրել, որի արդյունքում հակամարմիններ են հայտնաբերվել քաղաքացիների գրեթե մեկ քառորդի մոտ:
«Հակամարմինները առկա են Նյու Յորքի բնակիչների մոտ 20% –ի մոտ, սակայն ցուցանիշները կախված են բնակության վայրից», – պարզաբանել է Բրունոն:
Միևնույն ժամանակ, նա նշել է, որ սա դեռևս կոլեկտիվ իմունիտետ չէ, դեռևս ուսումնասիրվում է հակամարմինների առկայությունը և հայտնի չէ, թե որքան ժամանակ են մարդիկ ունենալու այդ իմունիտետը։
Նյու Յորքը դարձել էր Միացյալ Նահանգներում կորոնավիրուսի համավարակի կենտրոնը, լինում էին օրեր, երբ քաղաքում օրական 700 մարդ էր մահանում, իսկ ավելի քան 3 հազար մարդ հոսպիտալացվում էր: Ընդհանուր առմամբ, քաղաքում կորոնավիրուսից մահացել է 18 758 մարդ, մահվան մոտ 4600 դեպք դեռևս լրացուցիչ ստուգման կարիք ունի։ Ընդհանուր առմամբ քաղաքում վարակվել է 217.562 մարդ:
