Թուրքիայի մեջլիսը Հայաստան-Ադրբեջան սահմանին տիրող իրավիճակի հետ կապված հակահայկական հայտարարություն է տարածել։
Հայտարարության տակ ստորագրել են խորհրդարանի 4 խմբակցություններ, այդ թվում՝ իշխող «Արդարություն և զարգացում», «Ժողովրդահանրապետական», «Ազգայնական շարժում» և «Լավ» խմբակցությունները։ Հայտարարության տակ չի ստորագրել քրդամետ «Ժողովուրդների դեմոկրատական կուսակցությունը», որը հանդիսանում է խորհրդարանի երրորդ ուժ։
Խորհրդարանի հերթական նիստի ժամանակ հայտարարությունը ընթերցել է մեջլիսի փոխնախագահ Սյուրեյյա Սադի Բիլգինչը։ Հայտարարության մեջ մեղադրանքներ են հնչում Հայաստանի հասցեին՝ «Ադրբեջանի վրա հարձակում գործելու», «Հարավային Կովկասում խաղաղության հաստատմանը խոչընդոտելու», «Լեռնային Ղարաբաղը և հարակից տարածքները օկուպացնելու» հարցում։
Հայտարարության մեջ Թուրքիայի խորհրդարանը կոչ է արել միջազգային հանրությանը արձագանքել Հայաստանի՝ թուրք օրենսդիրների գնահատմամբ «իրավունքը արհամարհող» պահվածքին։
Բացի այդ 4 խմբակցությունները իրենց աջակցությունն են հայտնել Ադրբեջանին։
«Երկու պետություն, մեկ ազգ ընկալմամբ մշտապես խաղաղության և անվտանգության պաշտպան հանդիսացող Թուրքիան, այսուհետ ևս իր բոլոր հնարավորություններով կշարունակի լինել Ադրբեջանի կողքին տարածաքային ամբողջականությունը վերականգնելու վերջինիս ջանքերում»,- նշվել է հայտարարության մեջ։