Ֆուտբոլի Հայաստանի ազգային հավաքականի իսպանացի գլխավոր մարզիչ Խոսակին Կապարոսը, առաջին անգամ հանդիպելով հայ լրագրողների հետ, խոսեց ամենակարևորի մասին։ Մասնավորապես, անդրադառնալով Հայաստանի առաջնությունում լեգեոներների թվի սահմանափակմանը, իսպանացի մասնագետը կրկին կարևորեց տեղի կադրերին խաղալու հնարավորություն տալու հարցը:
Հիշեցնենք՝ երեկ ՀՖՖ գործկոմը որոշում է կայացրել, որի համաձայն՝ բարձրագույն խմբում հայտացուցակում ընդգրկված 23 ֆուտբոլիստներից 9-ը պետք է լինեն Հայաստանում մարզված (այն ֆուտբոլիստներն են, ովքեր 15 տարեկանից մինչ 21 տարեկանը գրանցված են եղել ՀՀ տարածքում գրանցված որևէ ակումբում կամ ակումբներում նվազագույնը 3 խաղաշրջան), կամ Հայաստանի ազգային/տարբեր տարիքային հավաքականների անդամներ:
«Եթե ավելի շատ ֆուտբոլիստներ հանդես գան ներքին առաջնությունում, դրանից կշահի նաև հավաքականը: Զարմացած էի այն խաղերի ժամանակ, երբ ակումբների կազմում ոչ մի հայ ֆուտբոլիստ խաղադաշտ դուրս չէր գալիս: Այդ ամենը խանգարում է պատանի, երիտասարդ ֆուտբոլիստների՝ կրթություն ստանալուց հետո ինքնադրսևորման շանս ունենալուն»,- նշեց մասնագետը: Վերջինս իր մտահոգությունն էր հայտնել նաև մայիսին, երբ ներկա էր գտնվել բարձրագույն խմբի առաջնության մի քանի հանդիպումների։
Խոսելով հավաքականի հեռանկարի մասին՝ Կապարոսը արեց ուշագրավ մի շեշտադրում։ Մասնավորապես, իսպանացի մասնագետի կարծիքով, ցանկությունն ու նվիրվածությունը հավաքականին ավելի կարևոր է, քան բուն ֆուտբոլային որակները: Փաստորեն Կապարոսը, քաջ գիտակցելով, որ մեր հավաքականը որակյալ կադրերի խնդիր ունի, հաջողության բանաձև է համարում նվիրվածություն ու մեծ ցանկությունը։ Ըստ Կապարոսի՝ հավաքականին նոր մրցակցություն կհաղորդի ընտրանի հրավիրված ևս մեկ ֆուտբոլիստ:
«Մարզչական շտաբը չի պատրաստվում ոչ մի հայ ֆուտբոլիստի անտեսել և պատրաստ է հնարավորություն տալ, եթե գտնի, որ վերջինս արժանի է խաղալ ընտրանու կազմում: Մինչ այս զրույց եմ ունեցել ազգային թիմի 19-20 ֆուտբոլիստի հետ: Ինձ հաճելիորեն զարմացրեց բոլոր տղաների նվիրվածությունը, և որ նրանք ցանկություն հայտնեցին հետագայում ևս հանդես գալ հավաքականում»,- ասաց նա:
Կապարոսը հրաժարվեց կարծիք հայտնել Լուկաս Սելարայանի, Խորեն Բայրամյանի, Արշակ Կորյանի և այլոց մասին, քանի որ դեռևս ոչինչ վերջնականապես հայտնի չէ: «Հնարավոր է, որ երիտասարդ թիմի անդամները խաղան հավաքականում, սակայն շատ կարևոր է, որ նրանք խաղային փորձ ունենան: Երիտասարդներին անհրաժեշտ է խաղալ, անհրաժեշտ է սխալներ թույլ տալ, իսկ եթե նրանք խաղային փորձ չունեն, պարզապես անհետանում են: Հայաստանի այլ տարիքային հավաքականների մարզիչները լավ աշխատանք են կատարում»,- ասաց իսպանացի մարզիչը: Վերջինս կարծում է նաև, որ Հայաստանի ընտրանին պետք է իսկական թիմ լինի և լինի այն թիմը, որը գիտի դաշտում ինչ անել, երբ գնդակը մրցակցի մոտ է, և երբ գնդակն իր մոտ է:
«Փորձելու ենք առավելագույնը ստանալ մեր ֆուտբոլիստներից: Պետք է հասնենք նրան, որ ընտրանին հավասարակշռված գործի թե պաշտպանությունում և թե հարձակման գծում»,- ասաց նա: Կապարոսի խոսքերով` Հայաստանի ընտրանին Ազգերի լիգային պետք է մասնակցի մեծ ցանկությամբ և առաջ շարժվի քայլ առ քայլ` ունենալով հստակ նպատակ: «Պետք է վստահ լինենք, որ կարող ենք մրցել ցանկացած հակառակորդի դեմ, եթե իսկական թիմի մտածելակերպ ունենանք: Չեմ խոսի մեր թույլ կողմերի մասին, քանի որ այդ ժամանակ առավելություն կտանք Մակեդոնիային և մյուս թիմերին: Ոչ մի թիմ անթերի չէ, պետք է պահպանել սառնասրտությունը և առաջ գնալ»,- նշեց նա: