Ադրբեջանում կադրային փոփոխությունները պայմանավորված են ներքին իրողություններով, որոնք ծավալվում են վաղուց և կարող են տանել ընդհուպ նախագահի փոփոխության՝ այսօր Մինսկում հայաստանցի լրագրողների հետ զրույցում հայտարարել է Հայաստանի արտաքին գործերի նախարարի տեղակալ Շավարշ Քոչարյանը: Նա Մինսկ է մեկնել վարչապետ Նիկոլ Փաշինյանի գլխավորած պատվիրակության կազմում՝ ԵՏՄ վարչապետների հավաքին մասնակցելու նպատակով:
Պաշտոնական Երևանը փաստորեն առաջին անգամ բաց տեքստով խոսում է այն մասին, որ Ադրբեջանում հավանական է նախագահի փոփոխություն: Երևանը մեծ հաշվով ինքն է իրավունք վաստակել խոսելու այդ մասին՝ Տավուշի ուղղությամբ ռազմագործողությունների փայլուն արդյունքի շնորհիվ, սակայն հատկանշական է, որ այդուհանդերձ ԱԳ նախարարի տեղակալի մակարդակով բարձրաձայնվում է այդպիսի հեռանկարի մասին: Հազիվ թե խոսքը զուտ քարոզչական հնարքի մասին է, քանի որ հարցը վերաբերում է ոչ թե հակառակորդ երկրի որևէ նախարարի կամ բարձրաստիճան այլ պաշտոնյայի, այլ նախագահի փոփոխության, հետևաբար դրա վերաբերյալ հրապարակային արձանագրումները ենթադրում են որոշակի քաղաքական արժեք և պատասխանատվություն: Եվ հազիվ թե Հայաստանի արտգործնախարարի տեղակալ Շավարշ Քոչարյանը չպատկերացներ այդ մասին բարձրաձայնելու պատասխանատվությունն ու զբաղվեր ինքնագործունեությամբ: Հատկանշական է, որ Շավարշ Քոչարյանն այդ մասին հայտարարել է հենց վարչապետի գլխավորած պատվիրակության կազմում ընդգրկված լինելու և Մինսկում գտնվելու շրջանակում:
Դատելով այդ հայտարարությունից՝ պետք է ենթադրել, որ Ադրբեջանում արտաքին գործերի նախարարի փոփոխությունը Երևանը դիտարկում է հենց իշխանափոխության համատեքստում, ինչն էլ հիմք է տալիս եզրակացնելու, որ պաշտոնական Երևանն այլևս անուղղակի, ոչ ֆորմալ կերպով, սակայն ազդարարում է, որ քաղաքական-դիվանագիտական շփում կլինի այլևս Ադրբեջանի նոր իշխանության հետ: Այլ հարց է, թե ինչպիսին է լինելու այդ իշխանությունը: Այստեղ թերևս երկար կանխագուշակումների կամ ենթադրությունների առիթ կամ հիմք չկա, քանի որ մեծ հավանականությամբ Ալիև նախագահին կփոխարինի Ալիևա նախագահը՝ Մեհրիբան Ալիևան: Հարցը տվյալ պարագայում այն է, թե ինչ ժամանակահատվածում և ինչ դինամիկայով տեղի կունենա այդ փոխատեղումը: Սա արդեն կախված է թերևս ոչ միայն ներքին հարցերից, քանի որ աշխարհաքաղաքական ուժային կենտրոնների համար այդ հարցը ամենևին երկրորդական չէ:
Այստեղ նկատելի է այն, որ Մեհրիբան Ալիևայի հարցում մեծ շահագրգռություն կունենա Ռուսաստանը, որը Ալիևային պատվով ընդունեց դեռևս 2019-ի նոյեմբերին: Ի դեպ, հենց այնտեղից վերադարձից անմիջապես հետո Ադրբեջանում հայտարարվեց խորհրդարանը լուծարելու և նորն ընտրելու մասին: Ալիևայի հարցում դիմադրում է թերևս Թուրքիան, և ուշադրության է արժանի այն, որ առաջին փոխնախագահի պաշտոնում Ալիևան դեռևս չի հաղորդակցվել Անկարայի հետ:
