«Վերջին իրադարձությունների ամենակարևոր ազդակներից մեկը Բաքվում տեղի ունեցած մասսայական բողոքի ցույցերն էին, որի արդյունքում ցուցարարները ներխուժեցին խորհրդարան»,- «Առաջին լրատվական»-ի հետ զրույցում ասաց իսրայելցի քաղաքագետ, հասարակական-քաղաքական գործիչ Ավիգդոր Էսկինը:
Մեր զրուցակցի խոսքով՝ թեպետ Բաքվում հնչել են պատերազմ սկսելու կոչեր, բայց կարևոր է այն, որ այնտեղ փաստվեց ծայրահեղ ռադիկալ իսլամիստությանը հարելու հանգամանքը. «Դա խոսում է այն մասին, որ Ադրբեջանում գոյություն ունի լուրջ բազա իսլամիստական տեռորիզմի համար: Ռևանշիստական բնույթի կոչերը, ատելության քարոզը՝ այդ ամենը խաղաղ գործընթացը խարխլում է: Էքստրեմիզմի այդ ալիքը վնաս է ներկայացնում: Նախագահ Ալիևը չի ձգտում էսկալացիայի, բայց կարող է սեփական ծայրահեղականներին կուլ գնալ»:
Հարցին, թե ինչ կարծիք ունի հայերի կողմից իսրայելական «Հերմես 900» անօդաչու թռչող սարքը խոցելու մասին, մեր զրուցակիցն ասաց. «Ոչ մի լուրջ փորձագետ գնահատական չի տա ռազմական բախումների վերաբերյալ՝ չունենալով ամբողջական տեղեկատվություն: Մենք միայն կարող ենք ասել, որ Հայաստանն ընդհանուր առմամբ մեկ անգամ ևս ցույց տվեց բարձր մարտունակություն»:
Միևնույն ժամանակ Ավիգդոր Էսկինը նշեց, որ Իսրայելը ոչ մի կերպ չի մեկնաբանում վերջին բախումները. «Իսրայելական մամուլում նույնիսկ այդ մասին հիշատակում չկա: Բայց Իսրայելը պետք է ուշադրություն դարձնի Ադրբեջանում առկա իսլամիստական ալիքին: Այնտեղ ամեն բան կարող է ավարտվել, ինչպես Թուրքիայում՝ ռադիկալների իշխանության գալով, որոնք աջակցում են ահաբեկչությանը: Իսրայելը նաև պետք է հաշվի առնի այն փաստը, որ Թուրքիան այս անգամ աչքի էր ընկնում յուրահատուկ ագրեսիվ պահվածքով: Իսկ Թուրքիան Երուսաղեմի համար ռազմավարական հակառակորդ է՝ բառի ամենաբուն իմաստով»: