Հայաստանի Հանրապետության պաշտպանության նախարարության խոսնակ Շուշան Ստեփանյանը հայտնել է, որ Հայ-ադրբեջանական պետական սահմանագոտում օպերատիվ իրավիճակը շարունակում է մնալ հանգիստ: Իրավիճակը հանգիստ է նաև արցախյան հատվածում:
Հայկական Զինված ուժերի հակաօդային պաշտպանությունը խոցել է հակառակորդի ևս երկու հարվածային անօդաչու թռչող սարք, որոնց բեկորներն ընկել են միջդիրքային տարածքում, ընդհանուր թվով խոցվել է հակառակորդի շուրջ 10 ԱԹՍ: Պաշտոնական տվյալներով՝ ադրբեջանական կողմից զոհվել է 12 զինվորական:
Հուլիսի 12-ից ընթացող մարտական գործողությունների ընթացքում ունեցել ենք երկու տասնյակ վիրավոր, այս պահին ունենք 10 վիրավոր, որոնք բուժում են ստանում բժշկական հաստատություններում, 5 զինծառայողի առողջական վիճակը գնահատվում է միջին ծանրության՝ դրական դինամիկայով, մեկ զինծառայող ծայրահեղ ծանր վիճակում է:
Ադրբեջանական Զինված ուժերն այս օրերին կիրառել են իրենց տրամադրության տակ գտնվող գրեթե բոլոր տրամաչափի զենքեր՝ գնդացիրներ, ականանետեր, նռնականետեր և այլն, տանկեր, անօդաչու թռչող սարքեր և այլ զինտեխնիկա:
Թեմայի շուրջ «Առաջին լրատվական»-ի հետ քննարկմանը մասնակցեցին ռազմական փորձագետ, պահեստազորի փոխգնդապետ Հրաչ Պետրոսյանցը և ռազմական փորձագետ Լեոնիդ Ներսիսյանը:
Անդրադառնալով դիտարկմանը, որ վարչապետ Նիկոլ Փաշինյանը ֆեյսբուքյան իր էջում տեսանյութ էր հրապարակել՝ նշելով, որ ՍՈւ-30-ները դուրս են գալիս մարտական հերթապահության՝ ապահովելու Հայաստանի օդային սահմանների անձեռնմխելիությունը՝ Լեոնիդ Ներսիսյանը նշեց, որ դա, ըստ էության, նորություն էր, քանի որ, որքանով հայտնի է, ՍՈւ-30-ները դեռևս մարտական հերթապահության չէին հանվել:
Հրաչ Պետրոսյանցի դիտարկմամբ՝ իրավիճակը այնքան չէր սրվել, որ անհրաժեշտություն լիներ օգտագործել Սու-30-ները. «Մենք ուղղակի ցույց ենք տալիս, որ պատրաստ ենք մեր ունեցած բոլոր զինատեսակները ներգրավել»:
«Ադրբեջանը ցանկացած պահի կարող է դիմել անտրամաբանական որոշակի գործողությունների: Կարծում եմ՝ Ադրբեջանը այս ամենին գնացել է՝ անզորությունից ելնելով, և խաղամոլների նման, երբ խաղադրույք են կատարում, պարտվում, և ավելի մեծ խաղադրույք են կատարում, Ադրբեջանը կորցնում է, փորձում է ինչ-որ առավելության հասնել, և ավելի շատ է կորցնում»,- նշեց Հրաչ Պետրոսյանցը:
Լեոնիդ Ներսիսյանի խոսքով՝ Ալիևը կփորձի փրկել դեմքը, և առաջիկա մեկ շաբաթվա կամ մեկ ամսվա ընթացքում հնարավոր է, որ սահմանի այլ հատվածում քայլեր ձեռնարկեն:
Նման իրավիճակներում քննարկումների առանցքում է հայտնվում ՀԱՊԿ-ը, որի անդամ է Հայաստանը: ՀԱՊԿ-ը հայտնեց խորհրդի արտահերթ նիստ հրավիրելու մասին, սակայն ժամեր անց չեղարկեց և համերաշխության կոչով հանդես եկավ: Անդրադառնալով հարցին, թե ինչու ՀԱՊԿ-ը հասցեական հայտարարությունով հանդես չի գալիս հայ-ադրբեջանական սահմանին ստեղծված լարվածության վերաբերյալ, Լեոնիդ Ներսիսյանը նշեց, որ ՀԱՊԿ-ից ռեալ ռազմական աջակցություն սպասել չարժե.«Ակնկալել կարելի է Մոսկվայից, եթե լայնածավալ պատերազմ լինի»:
Հրաչ Պետրոսյանցը նշեց, որ ցանկացած ռազմական կազմակերպություն պետք է պաշտպանի իր անդամի շահերը, սակայն ՀԱՊԿ-ը չի կատարում: «Քանի որ զինվորների առճակատում խրամատի մեջ չի եղել, ՀԱՊԿ-ի ռազմական ներգրավվածության մասին խոսք չի կարող լինել, ՀԱՊԿ-ը պետք է զուտ իր դիրքորոշումը հայտներ»: «Իսկ եթե ՀԱՊԿ-ը փորձի խանգարել Հայաստանին, ապա կդրվի մի գերեզմանաքար, վրան էլ գրված՝ ՀԱՊԿ»,- ընդգծեց ռազմական փորձագետը:
Մանրամասն՝ տեսանյութում: