2011 թ.-ի հուլիսի 22-ին Նորվեգիայում տեղի ունեցած ահաբեկչության մեջ մեղադրվող Անդերս Բերինգ Բրեյվիկը հայտարարել է, որ ինքը համախոհներ ունի ոչ միայն Նորվեգիայում, այլ նաև այլ երկրներում:
Մեղադրյալի հարցաքննությունն այսօր լրագրողներին է հանձնել փաստաբան Գեյր Լիպեստադը: Փաստաբանի խոսքերով՝ Բրեյվիկը պնդում է, որ հանդիսանում է հակաիսլամական ինչ-որ խմբավորման անդամ, որը երկու ներկայացուցչություն ունի Նորվեգիայում և մի քանիսն՝ արտասահմանում: Նորվեգացի քննիչները Բրեյվիկի այս պնդումներին թերահավատորեն են մոտենում:
Բրեյվիկի փաստաբանը նաև նշում է, որ իր պաշտպանյալը, ամենայն հավանականությամբ, անմեղսունակ է: «Բոլոր փաստերը վկայում են այն, որ նա հոգեկան հիվանդ է», – ասել է Լիպեստադը: Սակայն փաստաբանը դեռ չգիտի, թե արդյոք պատրաստվո՞ւմ է Բրեյվիկը հենվել իր հոգեկան խանգարման փաստի վրա, փոխանցում է Reuters գործակալությունը: Մեղադրյալի դատաբժշկական փորձաքննությունը կիրականացվի ավելի ուշ:
Բրեյվիկը չի գիտակցում, թե քանի մարդ է սպանել, և վստահ է, որ ոստիկանությունը շուտ կհասներ Ուտեյի կղզի, որտեղ նա գնդակահարում էր կուսակցական երիտասարդության հավաքի մասնակիցներին, ավելացրել է փաստաբանը:
