Независимая газета-ի փոխանցմամբ՝ Ռուսաստանի պաշտպանության նախարար Անատոլի Սերդյուկովն Ադրբեջանում նախագահ Իլհամ Ալիևի և Պաշտպանության նախարար Սաֆար Աբիևի հետ քննարկել է Գաբալայի ռադիոտեղորոշիչ կայանի (ՌՏԿ) հարցը։
Ադրբեջանական կողմը պատրաստակամություն է հայտնել Գաբալայի ՌՏԿ-ի հարցում շարունակել Ռուսաստանի Պաշտպանության նախարարության հետ իր համագործակցությունը, սակայն արդեն նոր պայմաններով։ Ադրբեջանը տվյալ խնդրի շուրջ նոր պարամետրեր է սահմանել։ Դրանք ենթադրում են նաև ՌՏԿ-ի վարձավճարի ավելացում։ Սակայն ճշգրիտ գումարի մասին դեռ չի նշվում։
Դրա հետ մեկտեղ, ադրբեջանական իշխանությունները փորձում են հասնել ՌՏԿ-ի կայանին տրամադրվող էլեկտրաէներգիայի վճարի և ՌՏԿ-ի անձնակազմի կազմում տեղացի կադրերի ավելացմանը։ Պետք է ավելացվի նաև Ռուսաստանի կողմից Ադրբեջանին վճարվող փոխհատուցման վճարը, որը սահմանված է նրա համար, որ Ադրբեջանը զրկված է տվյալ լեռնային շրջանում զբոսաշրջության զարգացման հնարավորությունից։
Իսկ թե ինչ են պայմանավորվել Սերդյուկովն ու Աբիևը, ամենայն հավանակությամբ, հայտնի կդառնա օգոստոսին, երբ կշարունակվեն նրանց բանակցությունները։ Մինչև օգոստոսի 15-ը նոր համաձայնագրի մշակմամբ կզբաղվեն կողմերի խորհրդատուները։
Մի շարք փորձագետներ Գաբալայի ՌՏԿ-ի վարձակալության պայմանների վերանայման հարցում Ադրբեջանի որոշումը համարում են Բաքվի պատասխան քայլը՝ մինչև 2044 թվականը Գյումրու ռազմաբազայի գործունեության շարունակման դիմաց։
Հիշեցնենք, որ «Դարյալ» տիպի Գաբալայի ՌՏԿ-ն շահագործման է հանձնվել 1985 թվականին: 2002 թվականին Ադրբեջանն այն վարձակալությամբ հանձնել է Ռուսաստանին, որը դրա դիմաց տարեկան 14 միլիոն դոլար է վճարում նրան:
Գաբալայի ՌՏԿ-ի հեռահարությունը կազմում է 6000 կիլոմետր: Այսինքն՝ նրա տեսադաշտում են գտնվում Իրանը, Թուրքիան, Հնդկաստանը, Մերձավոր Արևելքը, ինչպես նաև Հնդկական օվկիանոսն ու Ավստրալիայի մի մասը:
Գաբալայի ՌՏԿ-ի վարձակալության ժամկետն ավարտվում է 2012 թվականի օգոստոսին։ Կայանում աշխատում են 1400 ռուս զինծառայողներ։
