«Հայկական բնապահպանական ճակատ» նախաձեռնությունը հայտարարություն է տարածել, որի մեջ մասնավորապես նշել էին.
«Ահազանգ ենք ստացել Ամուլսարից, որ «Լիդիան»-ի վարձած պահնորդական ծառայության ներկայացուցիչները համապատասխան ծանր տեխնիկայով պատրաստվում են Ամուլսարի դիմադրական կետեր գնալ, որպեսզի այնտեղից հանեն Ամուլսարի պահապանների կացարանները:
Այս գործողությունները բացարձակ ապօրինի են, հերթական անգամ «Լիդիանը», իր նոր տերերով հանդերձ, պրովոկացիաներ է հրահրում։ Դեռևս մի քանի ամիս առաջ, մեր ուղարկած հարցմանն ի պատասխան, ՀՀ ոստիկանությունը հաստատել էր, որ արված չափագրումների համապատասխան՝ Ամուլսարի պահապանների կացարանները «Լիդիան»-ի տարածքից դուրս են գտնվում. սա ամրագրված է նաև ՀՀ ոստիկանության և «Լիդիան»-ի միջև դատական գործընթացի փաստաթղթերում, և նույնիսկ Կանադական դատարանում «Լիդիան»-ի հետ կապված վարույթի փաստաթղթերում:
Այս պահին տեղի ունեցողը ոչ այլ ինչ է, քան բռնի և ապօրինի միջամտություն խաղաղ հավաքների իրավունքի իրացմանը: Նման գործողությունները նաև սադրանք են և հղի են նոր պահնորդական ընկերության կողմից բռնության հրահրելու փորձերով (մենք արդեն համոզվել ենք, որ նրանք ընդունակ են դրան):
Ամուլսարի պահապանների կացարաններն արդեն իսկ գտնվում են հենց մայրուղու ճամփեզրին: Դրանք ոչ մի մետր չեն կարող տեղափոխվել: Դիմադրությունն իմաստ ունի հե՛նց այդ վայրում, իսկ մասնավոր ընկերությունը չի կարող հավակնել տիրանալ անգամ մայրուղիների բուֆերային հատվածներին»:
Պարզելու համար, թե ինչ գործողություններ են տեղի ունենում Ամուլսարի տարածքի մոտակայքում, «Առաջին լրատվական»-ը կապվեց Ջերմուկ քաղաքի բնակիչ Շիրակ Բունիաթյանի հետ: Վերջինս մեզ հետ զրույցում մանրամասնեց.
«Այս պահի դրությամբ ամեն ինչ խաղաղ է. բոլորս էլ այստեղ լսել էինք, որ այդպիսի բան են ցանկանում անել, այդպիսի խոսակցություններ էին մեզ հասել, սակայն ծանր տեխնիկա կամ նման այլ բան չենք տեսել: Երբ այդ տեղեկությունները մեզ հասան՝ տեղի բնակչությունը հավաքվեց Ամուլսարի պահպանման մեր 2-րդ պոստում և սպասում էինք տեսնելու, թե ինչ քայլերի են պատրաստվում դիմել, սակայն ավելի ուշ մեզ նաև ոստիկանությունից տեղեկացրին, որ ոչ մի այդպիսի գործողություն նախատեսված չէ, «Լիդիան»-ի վարձած պահնորդները այդպիսի բան չեն անելու, ծանր տեխնիկա չեն հանելու, հակառակ պարագայում՝ գոնե ոստիկանությունը կիմանար դրա մասին: Որոշ ժամանակ սպասելուց հետո վերադարձել ենք տուն, որովհետև, իրականում, որևէ գործողություն, որևէ շարժ նրանց կողմից չնկատեցինք»:
Դիտարկմանը, թե ստացվում է, որ կեղծ ահազանգ է եղե՞լ, Շիրակ Բունիաթյանը պատասխանեց.
«Ոչ, ես չեմ կարծում, թե կեղծ ահազանգ է եղել: Ըստ իս՝ պարզապես տեսնելով, որ դիմադրությունը մեծ է, Ջերմուկի և հարակից բնակավայրերի բնակիչներն էլ այս տեղեկությունը լսելով՝ ինքնաբուխ ձևով միանգամից եկել, հավաքվել են՝ որոշեցին իրենց պլանավորածն իրականություն չդարձնել, զերծ մնացին սադրանքներից: Ես վստահ կարող եմ ասել նաև, որ «Լիդիան»-ի վարձած պահնորդական ծառայության ներկայացուցիչները որևէ պարագայում չունեն այդպիսի լիազորություն՝ մեր դեմ տեխնիկա օգտագործելու կամ մեր տեղադրած տնակները, պոստերը քանդելու: Ըստ «Լիդիան»-ի հետ նրանց ունեցած պայմանագրի՝ նրանք ընդամենը պիտի հսկեն նրանց գույքը, ոչ ավելին, հակառակ պարագայում՝ ցանկացած գործողություն դիտվելու է որպես ինքնիրավչություն, որովհետև կրկնում եմ՝ նրանք այդպիսի լիազորությամբ օժտված չեն: Սկզբում պահնորդական ծառայության ներկայացուցիչները փորձում էին շոուներ անել, թե բա 50-60 հոգով, մահակներով, ինչ-որ խաղալիք զենքով պտտվում էին Ամուլսարի տարածքներում, մեր տնակների մերձակայքում և այլն, սակայն հետո նրանց հետ խոսեցինք և համաձայնության եկանք, որ այլևս այդպիսի բաներ չանեն, քանի որ մեր ժողովուրդն էլ դա չի հանդուրժի»:
Բունիաթյանի փոխանցմամբ՝ հիմա վիճակն այնտեղ խաղաղ է, հանգիստ, որևէ արտառոց միջադեպ տեղի չի ունենում և շարունակում են իրականացնել Ամուլսարի պահպանման իրենց առաքելությունը:
