Երկուշաբթի՝ հուլիսի 13-ին, Հունաստանի արտգործնախարարը ԵՄ-ին կխնդրի կազմել Թուրքիայի դեմ հնարավոր պատժամիջոցների ցուցակը, եթե Անկարան խախտի Հունաստանի տարածքային ամբողջականությունը:
Այս մասին հաղորդել է Euractiv-ը:
ԵՄ արտաքին գործերի նախարարները երկուշաբթի օրը Բրյուսելում հավաքվելու են հիմնականում Թուրքիային նվիրված հանդիպման համար:
Կբարձրացվեն ԵՄ-ի և Թուրքիայի հարաբերություններում բոլոր առավել խնդրահարույց հարցերը՝ Միջերկրական ծովում նավթի և գազի անօրինական հետախուզումից մինչև Թուրքիայի մասնակցությունը Լիբիայի և Սիրիայի հակամարտություններին:
«Մենք՝ Հունաստանը և Կիպրոսը, կոչ ենք անում ԵՄ-ին ունենալ ուժեղ պատժամիջոցների ցանկ, եթե Թուրքիան խախտի Հունաստանի և Կիպրոսի ինքնիշխան իրավունքները», – ասել է Հունաստանի արտգործնախարար Նիկոս Դենդասը:
Այնուամենայնիվ, ԵՄ դիվանագիտական շրջանակների աղբյուրները անցյալ շաբաթ ասում էին, որ երկխոսությունը պետք է առաջնահերթություն լինի Թուրքիայի ավելի ու ավելի հարձակողական վարքի ֆոնին: Եվրահանձնաժողովը հասկացրել է, որ պատժամիջոցների կիրառումը բանակցությունների սեղանի վրա չէ:
«Ցանկացած նախարար, ով ցանկանում է, կարող է բարձրացնել պատժամիջոցների հարցը: Բայց ԵՄ արտաքին քաղաքականության և անվտանգության քաղաքականության գերագույն ներկայացուցիչ Խոսեպ Բորելի հիմնական նպատակն է անդամ պետություններից ստանալ հստակ և միաձայն մանդատ՝ Անկարայի հետ երկխոսություն սկսելու համար», – ասել է նա:
Նախարարները կքննարկեն նաև նախկին բյուզանդական Սուրբ Սոֆիայի տաճարը մզկիթի վերափոխումը:
